ޔޫރޯ 2016 ނިމިފައިވާއިރު މިއަހަރުގެ މުބާރާތުގެ ގަދަ އެގާރަ އާއި މޮޅު ކުޅުންތެރިޔާ އިއުލާންކޮށްފިއެވެ.
ޕްރިމިއާ ލީގުގެ 3 ކުޅުންތެރިންނާއި ޗެމްޕިއަން ޕޯޗުގަލްގެ ގިނަ ކުޅުންތެރިންނާއެކު އިއުލާންކުރި މި ޓީމުގައި ދުނިޔޭގެ އެންމެ އަގުބޮޑު ކުޅުންތެރިޔާ، ރިއަލް މެޑްރިޑް އަދި ވޭލްސް ގެ ފޯވާޑް ގެރެތް ބޭލް ހިމަނާފައިނުވެއެވެ.
ލިސްޓުގައި މިފަހަރު އެންމެ ގިނައިން ހިމެނިފައިވަނީ ޕޯޗުގަލް ގެ ކުޅުންތެރިންނެވެ. ގޯލު ކީޕަރު ރުއި ޕެޓްރީސިއޯ، ޑިފެންޑަރު ޕެޕޭ އަދި ރަފޭލް ގެރޭރޯ އާއި ފޯވާޑު ކްރިސްޓިއާނޯ ރޮނާލްޑޯ ވަނީ ޕޯޗުގަލްގެ ކުޅުންތެރިންގެ ގޮތުގައި ޑްރީމް ޓީމުގައި ހިމެނިފައެވެ.
ޖަރުމަނު ތިން ކުޅުންތެރިންނަށް މިފަހަރުގެ ލިސްޓުން ޖާގަ ލިބިފައިވާއިރު އެކުޅުންތެރިންނަކީ ޑިފެންޑަރު ބޯޓެންގް އަދި ކިމިޗް ގެ އިތުރުން މިޑްފީލްޑަރު ޓޯނީ ކްރޫސްއެވެ.
މުބާރާތުގެ ސެމީ ފައިނަލަށް ދަތުރުކުރި ވޭލްސްގެ ޖޯ އެލެން އަދި އެރޮން ރަމްސޭވެސް ވަނީ މިއަހަރުގެ މުބާރާތުގެ ގަދަ އެގާރައިގައި ހިމެނިފައެވެ.
ފައިނަލުގައި ކުޅުނު ފްރާންސުގެ ޑިމިޓްރީ ޕަޔެޓް އަދި މުބާރާތުގެ އެންމެ ގިނަ ގޯލު ޖެހި ގްރީޒްމެން ވެސް ވަނީ މުބާރާތުގައި ދެއްކި މޮޅު ކުޅުމަށް ޑްރީމް ޓީމުގައި ހިމެނިފައެވެ.
ގްރީޒްމެން ވަނީ މިޝަރަފުގެ އިތުރުން މުބާރާތުގެ ރަން ބޫޓު އަދި މުބާރާތުގެ މޮޅު ކުޅުންތެރިޔާގެ މަގާމުވެސް ހާސިލުކޮށްފައެވެ.