ދިވެހި ރާއްޖޭގެ ތަރައްގީ ކުރުމަށް ހިންގާ މަޝްރޫއު ތަކުގައި ޖަރުމަނު ވިލާތުގެ އިންވެސްޓަރުން ރާއްޖެ ގެނައުމަށް ރައީސް އަބްދުﷲ ޔާމީން ރާއްޖެއަށް ކަނޑައަޅުއްވާފައި ހުންނަ ޖަރުމަނު ވިލާތުގެ ސަފީރާ ބައްދަލުކޮށް މަޝްވަރާކޮށްފި އެވެ.
ލަންކާ އާއި ރާއްޖެއަށް ޖަރުމަނުން ކަނޑައަޅާފައި ހުންނަ ސަފީރު ޑރ. ޔުރުގެން މޯހާޑް ރައީސް ޔާމީނަށް ޒިޔާރަތްކޮށް މަޝްވަރާކޮށްފައިވަނީ އިއްޔެއެވެ.
ޖަރުމަނު ވިލާތާއި ދިވެހި ރާއްޖެއާއި އޮންނަ ގާތް ގުޅުމަށް ރައީސް ޔާމީންވަނީ މިބައްދަލުވުމުގައި ދިވެހި އެންމެހާ ރައްޔިތުންގެ ފަރާތުން ޝުކުރު އަދާކޮށްފައެވެ.
އަދި އެގައުމުން ރާއްޖޭގެ ތިމާވެށި ތަރައްގީ ކުރުމަށް ކުރާ މަސައްކަތްތަކަށްވެސް ރައިސް ޔާމީންވަނީ ޖަރުމަނު ވިލާތަށް ޝުކުރު އަދާކޮށްފައެވެ.
މީގެ އިތުރުން ރާއްޖޭގެ ފަތުރުވެރިކަމުގެ މަޝްރޫއު ދުވަހެއް ދުވަހަކަށް އާބާދު ވަމުން އަންނަ އިރު އެ ދާއިރާއަށް ޖަރުމަނުގެ އިންވެސްޓަރުންގެ މުހިއްމު ކަމުގެ ވާހަކަވެސް ދެބޭފުޅުން ވަނީ ދައްކަވާފައެވެ.
ދެހާސް ތޭރައިގައި ރައީސް ޔާމީން ވެރިކަމަށް ވަޑައިގަތް ފަހުން ރާއްޖެ ވަނީ ޗައިނާ އާއި އޮންނަ ގުޅުން އިތުރުކޮށް ގިނައަދަދެއްގެ ޗައިނާ އިންވެސްޓަރުން ރާއްޖެ ގެނެސްފަ އެވެ.