މިނިވަން ދުވަހުގެ ގޮތުގައި ފާހަގަ ކުރާ ޖުލައި 26 ވިލޭރޭ ރާއްޖޭގެ މީހުން ދިރިއުޅޭ ހުރިހާ ރަށެއްގައި ވެސް ގައުމީ ދިދަ ނެގުމަށް ހާއްސަ ރަސްމިއްޔާތެއް ބާއްވަން ޖެހޭނެ ލޯކަލް ގަވަރަމަންޓް އޮތޯރިޓީ (އެލްޖީއޭ) އިން ބުނެފި އެވެ.
އެލްޖީއޭ އިން ބުނީ ހުރިހާ ކައުންސިލްތަކަކުން އެގޮތަށް އަމަލު ކުރުމަށް ހޯމް މިނިސްޓްރީ އަންގާ ކަމަށެވެ.
ދިދަ ނެގުމުގެ މި ރަސްމިއްޔާތުގައި ކޮންމެ ރަށެއްގައި ވެސް ދިދަ ނަންގަވައި ދެއްވާނީ އެ ރަށެއްގައި ހުންނަވާ ސަރުކާރުގެ އެންމެ އިސްވެރިޔާ އެވެ. އަދި ރަސްމިއްޔާތުގައި ވީހާވެސް ގިނަ ބަޔަކު ބައިވެރި ވުމަށް ހޯމް މިނިސްޓްރީ އެދެ އެވެ.
ރަސްމިއްޔާތުގައި ބައިވެރިން ގައުމީ ސަލާމް ވެސް ކިޔަަން ޖެހޭނެ އެވެ.
އެލްޖީއޭ އިން ބުނީ މިނިވަން ދުވަހުގެ ދިދަ ނެގުމުގަ ރަސްމިއްޔާތުގައި ބައިވެރިވި ސަރުކާރުގެ މުއައްސަސާތަކާއި ބައިވެރިންގެ އަދަދު އެނގޭނެ ގޮތަށް ރިޕޯޓެއް ތައްޔާރުކޮށް ފޮނުވައި ދިނުމަށް ވެސް ކައުންސިލްތަކުގައި މިނިސްޓްރީން އެދޭ ކަމަށެވެ.
މި އަހަރު ޖުލައި 26 ފާހަގަ ކުރާނީ ރާއްޖޭގެ 51 ވަނަ މިނިވަން ދުވަހެވެ.