ސްޕެއިން އަދި ޗެލްސީގެ މިޑްފީލްޑަރު ފެބްރިގާސް މެންޗެސްޓާ ޔުނައިޓެޑަށް ގެނައުމަށް މަސައްކަތް ކުރާ ޚަބަރު އިނގިރޭސި މީޑިޔާ ތަކުގައި ފެތުރެން ފަށައިފިއެވެ.
ބާސާ އިން ޗެލްސީއަށް ބަދަލުވި ފެބްރިގާސް ޔުނައިޓެޑަށް ގެނައުމަށް އޭނާގެ ކުރީގެ މެނޭޖަރު ހޯސޭ މޮރީނިއޯ މަސައްކަތް ކުރަމުން ދާ ކަމަށާއި ފެބްރިގާސް އާއި ޗެލްސީގެ އާ ކޯޗު ކޮންޓޭ އާ ދެމެދު އޮތް ގުޅުން ރަނގަޅު ނޫން ކަމަށް ޚަބަރު ވަނީ ފެތުރިފައެވެ.
ލެސްޓާ ސިޓީގެ މިޑްފީލްޑަރު ކަންޓޭ އާއި އޭއެސް ރޯމާގެ ނައިންގޮލަން އަދި ޔޫރޯ ޗެމްޕިއަންކަން ނެގި ޕޯޗުގަލްގެ ޖައޮ މާޓީނިއޯ އަކީ ކޮންޓޭ އަންނަ ސީޒަނުގައި ޗެލްސީއަށް ގެންނަން ބޭނުންވާ ކުޅުންތެރިންނެވެ. މިއީ ފެބްރިގާސް ގެ ރޯލަށް ކުޅޭ ކުޅުންތެރިންނެވެ.
ޗެލްސީގައި މޮރީނިއޯ އާއެކު ފެބްރިގާސް ވެސް 2014/15 ގެ ޕްރިމިއާ ލީގު ނެގި ނަމަވެސް ޖެހިގެން އައި ސީޒަނުގައި ޓީމުގެ ކުޅުން ދަށްވެ މޮރީނިއޯ މަގާމުން ވަކި ކޮށްފައިވަނީ ބައެއް ކުޅުންތެރިންގެ ސަބަބުން ކަމަށް އޭނާ ވަނީ ބުނެފައެވެ. އެ ކުޅުންތެރިންގެ ތެރޭގައި ފެބްރިގާސް ވެސް ހިމެނިފައިވާއިރު އޭނާ ޔުނައިޓެޑަށް ގެންނަން މޮރީނިއޯ މަސައްކަތް ކުރަނީ ކީއްވެތޯ ބައެއް ޗެލްސީ ސަޕޯޓަރުން އަންނަނީ ސުވާލު އުފައްދަމުންނެވެ.
ޔުނައިޓެޑުން އަންނަނީ ފްރާންސް އަދި ޔުވެންޓަސް ގެ މިޑްފީލްޑަރު ޕޮގްބާ ރިކޯޑު ފީއަކަށް ގެނައުމަށްވެސް މަސައްކަތް ކުރަމުންނެވެ. ނަމަވެސް ޕޮގްބާ ޔުވެންޓަސްގައި މަޑު ކޮށްލާނޭ ކަމަށްވެސް ބައެއް ރިޕޯޓަރުން އަންނަނީ މިހާރު ރިޕޯޓު ކުރަމުންނެވެ.