އިދިކޮޅު އިއްތިހާދުން މިރޭ ކާނިވާ ސަރަހައްދުގައި ޖަލްސާ ބާއްވަން ދިން ހުއްދަ ހައުސިން މިނިސްޓްރީން ބާތިލްކޮށްފި އެވެ.
މިނިސްޓަރު ޑރ. މުހައްމަދު މުއިއްޒު ވިދާޅުވީ ހުއްދަ ބާތިލް ކުރީ ޖަލްސާ ބާއްވަން ކާނިވާ ސަރަހައްދު ދޫކުރީ އެމްޑީޕީ އަށް ކަމަށް ވިޔަސް ޖަލްސާ ބާއްވަން އުޅެނީ އިތިކޮޅު އިއްތިހާދެއްގެ ނަމުގައި ކަމަށްވާތީ އެވެ.
ސަރުކާރުން ބުނާ ގޮތުގައި އިދިކޮޅު އިއްތިހާދު ކިޔާ ބަޔަކީ ސަރުކާރުން ދަންނަ ބައެއް ނޫނެވެ.
މުއިއްޒު ވިދާޅުވީ ހުއްދަ ބާތިލްކުރީ "ގައިރު ގާނުނީ ކަމަކަށް ހިތްވަރު ލިބޭ ފަދަ ގޮތަކަށް ޖަލްސާ ބާއްވަން އުޅޭތީ" ކަމަށެވެ.
މިނިސްޓަރު ވިދާޅުވީ އިދިކޮޅު އިއްތިހާދު ކިޔާ ބަޔަކަށް އެ ތަން ދޫކޮށްފައި ނުވާނެ ކަމަށެވެ.
"ގައުމުގެ ހަމަޖެހުން ނަގާލަން އުޅޭ ބަޔަކަށް ފުރުސަތެއް ނުދޭނަން، ގައުމު ހަލާކުކުރަން ފުރުސަތެއް ނުދޭނަން،" މުއިއްޒު ވިދާޅުވި އެވެ.