އިނގިރޭސިވިލާތުގެ ސަރުކާރުން ދިވެހި ސަރުކާރުގެ ވެރިންނާއި ކޯޓުތަކުގެ ބައެއް ފަނޑިޔާރުންނާ މެދު ފިޔަވަޅުއަޅައި އެ ގައުމަށް ދަތުރު ކުރުން މަނާ ކުރުމާ މެދު ވިސްނަމުންދާކަން ހާމަކޮށްފައިވާތީ އިދިކޮޅު އެމްޑީޕީން އެކަމަށް މަރުޙަބާ ކިޔައިފި އެވެ.
އެ ޕާޓީން މިއަދު ނެރުނު ބަޔާނެއްގައި ބުނީ އިނގިރޭސި ސަރުކާރުގެ ފަރާތުން އެގޮތަށް ހާމަކޮށްފައި ވަނީ އިނގިރޭސި ސަރުކާރުގެ ޚާރިޖީ އަދި ކޮމަންވެލްތްގެ ކަންކަމާ ބެހޭ ވަޒީރު، ހޫގޯ ސްވައިއާ، އަށް އިނގިރޭސި ޤާނޫނު ހަދާ މަޖިލީހުގައި ރާއްޖޭގެ ޙާލަތާ މެދު ދެންނެވުނު ސުވާލަށް ޖަވާބު ދެއްވުމުގައި ކަމަށެވެ.
އެމްޑީޕީން ބުނީ ރާއްޖޭގެ ވެރިކަމުގެ ބާރުން ރައްޔިތުންނަށް ކުރިމަތިކޮށްފައިވާ ހާލަތު ދުވަހުން ދުވަހަށް ގޯސްވަމުންދާކަމީ އިނގިރޭސި ސަރުކާރުން އިންތިހާއަށް ކަންބޮޑުވާކަމެއް ކަމަށެވެ.
"އަދި ކޮމަންވެލްތް މިނިސްޓީރިއެލް އެކްޝަން ގްރޫޕް (ސީމެގް) އިން އެންމެ ފަހުން ރާއްޖެ އަށް އަންގާފައިވާ އެންގުންތަކަށް ފުރިހަމައަށް އަމަލުކޮށް، ރާއްޖޭގެ ސަރުކާރުން އދ. އާއި ކޮމަންވެލްތްގެ ޚާއްޞަ މަންދޫބުންނާ އެކު ހަރުދަނާ ގޮތުގައި ޝާމިލުވެ މަސައްކަތް ކުރުމުގެ މުހިއްމުކަމާއި، ސެޕްޓެމްބަރ މަހުގައި އޮންނަ ސީމެގް ގެ ބައްދަލުވުމުގެ ކުރިން އެކަންކަމުގައި ރަނގަޅު ކުރިއެރުން ހޯދުމުގެ މުހިއްމުކަން ފާހަކުރައްވާ ކަމަށް ވިދާޅުވިއެވެ." އެމްޑީޕީން ބުންޏެވެ. "ދިވެހި ސަރުކާރުންނާއި ޖުޑިޝަރީގެ ފަރާތުން ޤާނޫނުން ބޭރުން ޢަމަލުކޮށް އިންސާނީ ޙައްޤުތަކަށް އަރައިގަނެ، އަނިޔާވެރިކަމާއި، ނާއިންސާފު އިސްކޮށް، އަދި ރާއްޖޭގެ ޑިމޮކްރެސީ ނެތިކޮށްލުމުގެ ޢަމަލުތައް ހިންގުން ދުވަހުން ދުވަހަށް އިތުރުވަމުންދާތީ، އެމަލުތައް ހިންގާ ވަކިވަކި ފަރާތްތަކާމެދު ފިޔަވަޅު އެޅުމަކީ ރާއްޖޭގެ ރައްޔިތުންނާއި ޑިމޮކްރެސީ ސަލާމަތްކޮށް ރައްކާތެރިކުރުމަށް މުހިއްމުކަމެއް ކަމުގައި އެމްޑީޕީން ދެކެމެވެ."