މިރޭ އިދިކޮޅު އިއްތިހާދުން މާލޭގައި ބާއްވާ ފުރަތަމަ ޖަލްސާއަށް އެމްޑީޕީއަށް ކާނިވާ ސަރަހައްދު ދޫކޮށް ޖަލްސާއަށް ތައްޔާރުވަމުން ދަނިކޮށް، ހުއްދަ ބާޠިލް ކުރި ނަމަވެސް ތާވަލް ކުރި ގޮތަށް ޖަލްސާ ބާއްވާނެ ކަމަށް އެމްޑީޕީން ބުނެފިއެވެ.
އެމްޑީޕީން ބުނީ ޖަލްސާ ކަނޑައެޅި ގޮތަށް ކުރިއަށްގެންދާނެ ކަމަށާއި، ޖަލްސާއަށް ސަރުކާރުން ހުރަސް އަޅައިގެން ނުވާނެކަމަށެވެ.
ޖަލްސާ ބޭއްވުމަށްދިން ހުއްދަ ހައުސިން މިނިސްޓްރީން ބާޠިލް ކޮށްފައިވަނީ "އައިރު ގާނޫނީ ހަރަަކާތަކަށް" ފުރުސަތު ނުދޭނެކަމަށް ބުނެއެވެ.
އެމްޑީޕީން ހައުސިން މިނިސްޓްރީއަށް މިއަދު ފޮނުވި ސިޓީއެއްގައި ބުނެފައިވަނީ އެމްޑީޕީން ވަކި ބަޔަކަށް ކާނިވާ ސަރަހައްދު ދޫނުކުރާ ކަމަށާއި، ދެ ޕާޓީ ގުޅިގެން މީގެ ކުރިންވެސް ޖަލްސާ ބާއްވަމުން ގޮސްފައިވާ ކަމަށެވެ.
އިދިކޮޅު ފަރާތްތަށް ގުޅިގެން ޖަލްސާއެއް ބޭއްވުމަށް ތައްޔާރު ވަމުންއަންނަ އިރު އެމްޑީޕީއާއި އެކު ރަސްމީ ސިފައެއްގައި ގުޅިފައިވަނީ އަދާލަތު ޕާޓީން އެކަނިއެވެ. އިދިކޮޅު އިއްތިހާދުގެ ހަރަކާތާއި ޖުމްހުރީ ޕާޓީން ގުޅިފައި ނުވާ އިރު ދެން އިތުރަށް ހަރަކާތްތެރިވަމުން އަންނަނީ ވަކިވަކި ސިޔާސީ މީހުންނެވެ.
ހައުސިން މިނިސްޓަރ ޑރ. މުޙައްމަދު މުއިއްޒު އިދިކޮޅު އިއްތިހާދު "އައިރު ގާނޫނީ ބައެއް" ކަމަށް ނިންމަވައި ހުއްދަ ބާޠިލް ކުރިއިރު މީގެ ކުރިން ސަރުކާރު ހިންގާ ޕީޕީއެމް އާއި އެމްޑީއޭ ގުޅިގެން ވެސް ޖަލްސާ ބާއްވާފައިވެއެވެ.
މިރޭގެ ޖަލްސާއަށް ގިނަ ބަޔަކު ޖަމާވާނެ ކަމަށް ބެލެވޭ އިރު، ޖަލްސާއަށް ވީހާވެސް ގިނަ ބަޔަކު ދިއުމަށް އެމްޑީޕީގެ ރައީސް މުހައްމަދު ނަޝީދުވަނީ އެދިވަޑައިގެންފައެވެ.