ހިތަދޫ ގޭބިސީތަކަށް މިހާރު ސަޕްލައި ފެން ގުޅައި ދިނުމުގެ މަސައްކަތް ކުރިއަށްދާތީ ގޭބިސީތަކުން އެކަމަށް އެދޭ ފޯމް ފުރަން ފެނަކަ ކޯޕަރޭޝަނުން އެދިއްޖެ އެވެ.
އެ ކުންފުނީގެ ވޯޓަ އެންޑް ސްވެރެޖް ޑިޕާޓްމަންޓުން ނެރުނު ނޯޓިހެއްގައި ބުނީ ފެން ގުޅައި ދިނުމުގެ ހިދުމަތަކީ ކުންފުނިން މިހާރު ހިލޭ ދެމުން އަންނަ ހިދުމަތެއް ކަމަށެވެ.
އެހެންވެ ހިދުމަތަށް އެދޭ ފޯމް ފުރަން ކުރިން ވެސް އެންގި ނަމަވެސް ބައެއް ފަރާތްތަކުން ފޯމް ނުފުރާ ކަމަށް ފެނަކަ އިން ބުންޏެވެ.
އެހެން ނަމަވެސް އަންނަ މަހުގެ 15 ގެ ފަހުން، ހިދުމަތަށް އެދޭ ފޯމް ނުފުރާ ނަމަ، ދެން ހިދުމަތް ގުޅައި ދޭނީ ފީއަކާ އެކުގައި ކަމަށް ފެނަކަ އިން ބުންޏެވެ.
އެ ކުންފުނިން އަދި ބުނީ ފެނާއި މީޓަރު ގުޅައި ދީފައިވާ ތަންތަނުގެ ތެރެއިން ވެސް ފޯމް ނުފުރައި ތިބި ފަރާތްތަލުން އަލުން ފޯމް ފުރަން ޖެހޭނެ ކަމަށެވެ.
"ހިލޭ ފެން ގުޅައި ދޭނީ މިޓަރު ލައި ދިނުމުގެ ހިދުމަތަށް ފޯމް ފުރައި، ހުށަަޅާފައިވާ ފަރާތްތަކަށާއި މިހާރު ފޯމް ނުފުރައްވައި ތިބި ފަރާތްތަކުގެ ތެރެއިން މި ދެންނެވި ތާރީހު [އޮގަސްޓް 15 ގެ ކުރިން] ފޯމް ފުރައި ނިންމާ ފަރާތްތަކަށެވެ." ފެނަކަގެ ނޯޓިހްގައިވެ އެވެ.