ރައީސް ޔާމީންގެ ކެބިނެޓްގައި ހިމެނި ވަޑައިގަންނަވާ ބޭފުޅުންނާއި މަޖިލިސް މެމްބަރުން ތަކެއް ވަރަށް އަވަހަށް އިދިކޮޅު އިއްތިހާދާއި ގުޅޭ ވަގުތު ކައިރިވެއްޖެ ކަމަށް އިއްތިހާދުގައި ހިމެނިވަޑައިގަންނަވާ އަދާލަތު ޕާޓީގެ ނައިބް ރައީސް އަލީ ޒާހިރު ވިދާޅުވެއްޖެ އެވެ.
އިދިކޮޅު އިއްތިހާދުން އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި އަލީ ޒާހިރު ވިދާޅުވީ، ރައީސް ޔާމީން އާއި މަދު ބޭފުޅުން ކޮޅެއް ފިޔަވައި އެމަނިކުފާންގެ ސަރުކާރުގެ އިސް ބޭފުޅުންތަކެއް ވެސް ވަރަށް އަވަހަށް އިއްތުހާދާއި ގުޅުމަށް ހަމަޖެހިފައިވާ ކަމަށެވެ.
އަލީ ޒާހިރު ވިދާޅުވީ ގިނަ ރައްޔިތުން އިއްތިހާދާއި ގުޅެމުން އަންނަ ކަމަށާއި، މި ޖުލައި މަހުގެ 21 ވަނަ ދުވަހު ބާއްވާ ޖަލްސާއަށް ވީހާވެސް ގިނަ ބަޔަކު އައުމަށް ގޮވާލެއްވި އެވެ.