ތުރުކީގައި ބަޣާވާތެއް ކުރުމަށް މަސައްކަތް ކުރިތާ 48 ގަޑިއިރު ނުވަނީސް އަވަށްޓެރި އާމީނިއާގައި ފުލުސް ހެޑްކުއާޓާސް އަށް ބަޑިއާއެކު ވަދެ ބަޔަކު ރަހީނުކޮށްފިއެވެ.
ރަހީނުކުރި މީހުންގެ އަދަދު ކަށަވަރުވެފައި ނުވިނަމަވެސް އެގައުމުގެ ދިފާއީ ބާރުން ދަނީ ރައްކާތެރި ކަމާއެކު މީހުން އަނބުރާ ލިބޭނެ ގޮތެއް ހޯދުމަށް ކުށްވެރިންނާ މުއާމަލާތު ކުރަމުންނެވެ.
ގައުމުގެ ވެރިރަށް ޔެރެވެންގައި ހުންނަ ފުލުސް އެޗްކިއު އަށް ހަތިޔާރާއެކު ބަޔަކު ވަދެ ތަން ހިސޯރުކޮށް އެތެރޭގައި ތިބި އެންމެން ވަނީ ރަހީނުކޮށްފައެވެ. ސެކިއުރިޓީ ސާވިސްގެ އޮފިޝަލަކު 'އަލް ޖަޒީރާ' އަށް މައުލޫމާތުދީފައިވެއެވެ.
އެގައުމުގެ ޚަބަރު ފަތުރާ ވަސީލަތްތަކުން ރިޕޯޓުކޮށްފައިވާގޮތުން ރަހީނުންގެ ތެރޭގައި ޑެޕިއުޓީ ޗީފް އޮފް ޕޮލިސްވެސް ހިމެނެއެވެ.
ހަނގުރާމަވެރިން ޑިމާންޑުކޮށްފައިވަނީ ހައްޔަރު ކުރެވިފައިވާ އެގައުމުގެ އިދިކޮޅު ސިޔާސީ ލީޑަރު އަދި ކުރީގެ އަސްކަރިއްޔާގެ ކޮމާންޑަރެއް ކަމުގައިވާ ޖިރައިރް ސެފީލިއަން މިނިވަން ކުރުމަށެވެ.
ސެފީލިއަން އަކީ މިހާރުގެ ވެރިކަމަށް ވަރަށް ބޮޑަށް ފާޑު ކިޔާ އިދިކޮޅު ލީޑަރެކެވެ. އޭނާ ހައްޔަރު ކޮށްފައިވަނީ މިދިޔަ މަހުގައެވެ.