އިދިކޮޅު އިއްތިހާދުގެ ތަރުޖަމާން އަދި ގަލޮޅު ދެކުނު ދާއިރާގެ މަޖްލިސް މެމްބަރު އަހްމަދު މަހްލޫފް މާދަމާ ޖަލަށްލުމަށް ރާވަމުންދާ ކަމުގެ މައުލޫމާތު ލިބެމުންދާ ކަމަށް މަހްލޫފް ވިދާޅުވެއްޖެއެވެ.
މަހްލޫފް މިރޭ ކުރެއްވި ޓްވީޓެއްގައި ވިދާޅުވެފައިވަނީ މާދަމާ އޭނާ ޖަލަށް ހުކުމް ކުރާ ކަމުގެ މައުލޫމާތު ލިބެމުންދާ ކަމަށެވެ.
"މާދަން އަޅުގަނޑު ޖަލަށް ލާން ހުކުމް ކުރާކަމުގެ މައުލޫމާތު އެބަލިބޭ. އިރާދަކުރެއްވިއްޔާ ސަލާމަތްވެގެން މިއަށްވުރެ ގަދައަށް މަސައްކަތް ކުރާނަން" މަހްލޫފްގެ ޓްވީޓްގައި ވެއެވެ.
އިދިކޮޅު އިއްތިހާދުން މިމަހުގެ 21 ވަނދުވަހުގެ ރޭ ބޮޑު ޖަލްސާއެއް ބޭއްވުމަށް ތައްޔާރުވަމުން އަންނަ އިރު މަހްލޫފް ވިދާޅުވީ "ހުއްދަ ދިނަސް ނުދިނަސް" ޖަލްސާ ބާއްވާނެ ކަމަށެވެ.
މަހްލޫފް ވަނީ އިއްޔެ ހަވީރު ޖަލްސާއަށް ގޮވަމުން ދަނިކޮށް ހައްޔަރުކޮށް ދޫކޮށްލާފައެވެ.