މިދިޔަ އަހަރުގެ މާޗު މަހުގައި ބޭއްވުނު މުޒާހަރާއެއްގައި ފުލުހުން މަގު ބަންދުކުރުމަށް ޖަހާފައިވާ ބެރިކޭޑެއް ފަޅާލައި ގަދަކަމުން ވަންނަން އުޅުނު ކަމުގެ ދައުވާ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފުގެ މައްޗަށް އުފުލައި ދައުވާގެ އަޑުއެހުންތައް ނިންމާލައިފި އެވެ.
ދައުވާގެ އަޑުއެހުންތައް ނިމިފައިވިނަމަވެސް ހުކުމް ކުރާނެ ދުވަހެއް އިއުލާންކޮށްފައެއް ނުވެއެވެ. އަދި މަހުލޫފުގެ ފަރާތުން ކޯޓަށް ހުށައެޅި ދިފާއީ ހެކިންގެ ހެކިބަހެއްވެސް ނަގާފައެއް ނުވެއެވެ.
އިއްޔެ ފުލުހުންގެ ދައުރު އަދާ ކުރުމަށް ދަތި ކުރިކަމަށް ބުނެ އުފުލާފައިވާ ދައުވާވެސް މަހުލޫފާއި ދެކޮޅަށް ސާބިތުވެ ހަތަރު މަހަށް ޖަލަށް ލާން ކޯޓުން ހުކުމް ކުރުމަށްފަހު މާފުށީ ޖަލުގައި ބަހައްޓައިގެން މިއަދު ދެވަނަ ދައުވާ އަށް ހާޒިރުކޮށްފައިވާއިރު މަހުލޫފަށް ސަޕޯޓުކުރާ ގިނަ ބަޔަކު ކްރިމިނަލް ކޯޓު ސަރަހައްދުގައި ތިބިއެވެ.
މަހުލޫފު ކޯޓަށް ހާޒިރުކޮށްފައިވަނީ ބިޑި އަޅުވައިގެންނެވެ. މިދައުވާ މަހުލޫފާ ދެކޮޅަށް ސާބިތުވެއްޖެނަމަ އެންމެ ބޮޑު އަދަބަކަށް ކޯޓުން ދެވޭނީ 6 މަސް ދުވަހުގެ ޖަލު ހުކުމެކެވެ.