ފުލުހުންގެ ބެރިކޭޑް ދުރަށް ޖައްސައި ފުލުހުންގެ ދައުރު އަދާކުރުމަށް ހުރަސްއެޅި ކަމަށް ބުނެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފުގެ މައްޗަށް އުފުލާފައިވާ ދައުވާގެ އަޑުއެހުންތައް އިއްޔެ ނިމި ހުކުމް ކުރުން މާދަމާއަށް ފަސްކޮށްފިއެވެ.
މަހުލޫފުގެ ފަރާތުން ކޯޓަށް ހުށައަޅި އެއްވެސް ހެކިބަހެއް އިއްޔެގެ އަޑުއެހުމުގައި ނުނަގައި ދައުލަތުން ހުށައެޅި ހެކިންގެ ހެކިބަސް ނަގައި އަޑުއެހުން ނިންމާފައިވާއިރު މަހުލޫފުގެ ވަކީލުވަނީ މިއީ ވަރަށް ސިޔާސީ ދައުވާއެއް ކަމަށް ސިފަކޮށްފައެވެ.
މަހުލޫފުގެ ޝަރީއަތް ކޯޓުން ކުރިއަށް ގެންދަނީ އާންމުކޮށް ޝަރީއަތް ކުރާ ގޮތާ ވަރަށް ތަފާތުކޮށް، މުޅިންވެސް ސިޔާސީގޮތުން އޭނާ ދެރަކޮށްލުމަށް ކަމަށްވެސް ވަކީލު ވަނީ މީޑިޔާއަށް މައުލޫމާތު ދީފަ އެވެ.
މަހުލޫފު މައްޗަށް ދައުލަތުން ދައުވާ އުފުލާފައި ވަނީ މިދިޔަ އަހަރުގެ މާޗް މަހުގެ 25 ވަނަ ދުވަހުގެ ރޭ 9:30 އިން ފެށިގެން މާލޭގެ އެކި ސަރަހައްދުތަކުގައި ބަޔަކު މުޒާހަރާ ކުރަމުންދަނިކޮށް ބޮޑުތަކުރުފާނުމަގާއި މުހައްމަދު އިސްމާއީލް ދީދީ ގޯޅި ބެރިކޭޑު ޖަހައި ބަންދުކޮށްފައި ވަނިކޮށް މަހުލޫފް ބެރިކޭޑުތައް ކޮށްޕައި ދުރަށް ޖެއްސުމަށް ފަހު ގަދަކަމުން ފުލުހުން ބަންދުކޮށްފައިވާ ސަރަހައްދަށް ވަދެފައިވާ ކަމަށް ބުނެއެވެ.