އައްޑޫ ވިމެންސް އެސޯސިއޭޝަން (އަވަ) އަދި އައްޑޫ ހައި ސްކޫލް ގުޅިގެން އައްޑޫގެ ބޮޑެތި މީހުންނަށް އިނގިރޭސި ދަސްކޮށް ދޭ ކުލާހެއް ފަށަން ތައްޔާރުވެއްޖެ އެވެ.
އިނގިރޭސީގެ އެންމެ ބޭސިކް އިން ފަށައިގެން އޯ ލެވެލް އަދި އޭ ލެވެލް ދަރަޖައަށް ވެސް ކިޔަވައިދޭ މި ކުލާހުގައި ކިޔަވައި ދޭނީ އައްޑޫ ހައި ސްކޫލުގެ އިނިގިރޭސި މުދައްރިސުންނެވެ.
ކުލާސް ފެށުމުގެ ގޮތުން މި އަވައިގެ މެމްބަރުންނާއި އައްޑޫ ހައި ސްކޫލުގެ އިސްވެރިން ވަނީ ބައްދަލުކޮށްފަ އެވެ. މި ބައްދަލުވުމުގައި ކުލާހުގައި ބައިވެރިވުމަށް މިހާތަނަށް ނަން ނޯޓްކޮށްފައިވާ ބޭފުޅުން ވެސް ބައިވެރިވި އެވެ.
މި ބައްދަލުވުމުގައި އަވައިގެ ރައީސާ ޑރ. މަރިޔަމް ޝަކީލާ ވިދާޅުވީ އައްޑޫގެ އަންހެނުންނަށް އަމާޒުކޮށްގެން މިފަދަ ޕްރޮގްރާމުތައް ހިންގައި އަންހެނުންނަކީ މުޖުތަމައުގައި ގާބިލް ބަޔަކަށް ހެދުމަށް އެޖަމިއްޔާއިން އަބަދު ވެސް މަސައްކަތް ކުރައްވާ ކަމަށެވެ.
އަދި ޖަމިއްޔާގެ ފަރާތުން ހޯއްދަވައި ދެއްވަވާ ފުރުޞަތުތައް އެންމެ އެދެވޭ ގޮތުގައި ހުރިހާ ބޭފުޅުން ވެސް ބޭނުން ކުރުމަކީ ވަރަށް ބޮޑު އެދުމެއް ކަމަށް ޝަކީލާ ވިދާޅުވި އެވެ.
ކުރިއަށް އޮތް މުސްތަގުބަލުގައި ވެސް މިފަދަ ތަފާތު ޕްރޮގްރާމްތައް ހިންގަވާނޭ ކަމަށާއި އެފަދަ ޕްރޮގްރާމްތަކުގައި ބައިވެރިވެ އޭގެ ފައިދާ އެންމެ އެދެވޭ ގޮތުގައި އެންމެ ބޭފުޅުންވެސް ހޯދުމަކީ ވަރަށް އެދެވޭ ކަމެއް ކަމުގައި ރައީސާ ވަނީ ވިދާޅުވެފަ އެވެ.
އައްޑޫ ހައި ސްކޫލުގެ ޕްރިންސިޕަލް އިބްރާހިމް ނަދީމް ވަނީ އަވައިން މިފަދަ އަގުހުރި މަސައްކަތެއް ފައްޓަވާ ދެއްވުމުން އެ ޖަމިއްޔާ އަށް ޝުކުރު އަދާކޮށްފަ އެވެ.
އަދި މިފަދަ ފުރުސަތެއް ލިބުމުން ބައިވެރިން އޭގެ ބޭނުން އެންމެ ހެޔޮ ގޮތުގައި ހިފުމަށް ކުލާހަށް ހާޒިރުވެ އުނގެނެން ނަދީމް ވަނީ އިލްތިމާސްކޮށްފަ އެވެ.
ނަދީމް ވިދާޅުވީ އަލަށް ފަށާ ކުލާހަކަށްވެފައި ބައިވެރިންނަށް އިތުރު އޮޅުން އެރުމުން ސަލާމަތްކޮށް ދިނުމަށް މި ވަގުތު ކުލާސް ހިންގަވާނީ ހުސް ރާއްޖޭގެ ޓީޗަރުން ކަމަށެވެ.
ބިދޭސީ ޓީޗަރުންނާއި ކުލާސް ހަވާލުކޮށްފިނަމަ ފަހަރެއްގައި ބައިވެރިންނަށް ކުލާހުގައި ކުރިއަށް ދިއުމަށް އުނދަގޫވެ ކުލާސް މަތިން ފޫހިވެ ދިއުމާއި އެފަދަ ކަންތައްތަކުން ބަރީއަ ވުމަށް މިވަގުތު އެންމެ އެދެވޭ ގޮތަކަށް އޮތީ ބިދޭސީ ޓީޗަރުންނަށް ވުރެ ބޮޑަށް ކުލާސް ހިންގުމުގައި ބައިވެރި ވާނީ ދޭސީ ޓީޗަރުންނެވެ.
މި ކުލާހަކީ މުޅިން ހިލޭ ކުރިއަށް ގެންދާ ކުލާހަކެވެ.
އަވައިން ދީފައިވާގޮތުން މިހާރުވެސް ކުލާސް ފެށޭ ވަރަށް ވަނީ މީހުން ހަމަވެފަ އެވެ. ނަމަވެސް އަދިވެސް ބައިވެރިވުމުގެ ފުރުސަތު ވަނީ ހުޅުވާލައިފަ އެވެ.