މިދިޔަ ހުކުރު ދުވަހުގެ ރޭ ދުނިޔެ ސިއްސުވާލީ ތުރުކީއަށް ގެންނަން އެގައުމުގެ އަސްކަރިއްޔާއިން މަސައްކަތް ކުރި ބަޣާވާތުގެ ހަބަރުންނެވެ.
އަސްކަރިއްޔާގެ ބައެއް ޖެނެރަލުންނާއި، ޝަރުއީ ދާއިރާގެ އިސްފަރާތްތައް ގުޅިގެން ހިންގަން އުޅުނު ބަޣާވާތް ނާކާމިޔާބް ކޮށްލީ ތުރުކީގެ ރައީސް ޠޮއްޔިބް އުރުދުއާން ކުއްލި ގޮތަކަށް ރައްޔިތުންނަށް ދެއްވި މެސެޖަކުންނެވެ.
ޗުއްޓީއެއްް ހޭދަކޮށްލެއްވުމަށް ތުރުކީގެ ހުޅަގުބިތު ރިސޯޓެއްގައި ހުންނަވަނިކޮށް، އަސްކަރިއްޔާއިން ގެންނަން އުޅުނު ބަޢާވާތް ނާކާމިޔާބް ކޮށްލީ، އުރުދުއާން އެނބުރި އިސްތަންބޫލްއަށް ވަޑައިގެން އެގައުމުގެ ރައްޔިތުންނާއި މުޙާޠަބްކޮށް، ހަތިޔާރާއި އެކު ނިކުމެ ތިބި އަސްކަރިއްޔާގެ "ބާޢީންނާއި" ދެކޮޅަށް ރައްޔިތުން ނިކުތުމަށް ގޮވާލުމުންނެވެ.
އުރުދުއާން އެދުމާއި އެކު އެތައް މިލިއަން ރައްޔިތުންނެއް ވަނީ އިންތަންބޫލްގެ މަގުތަކަށް ނިކުމެ، އަސްކަރިއްޔާގެ ހަތިޔާރުއެޅި ސިފައިންނާއި ކުރިމަތިލައި ކުޑަ ހިދުކޮޅެއްގެ ތެރޭގައި ބަޢާވާތް ނާކާމިޔާބް ކޮށްލާފައެވެ.
މިހުރިހާ ކަމެއް ހިގާ ދިޔަ އިރު ދިވެހި ރާއްޖޭގެ ސިޔާސީ މަސްރަހްވެސް މިވަނީ ނާޒުކު ހާލަތެއްގައެވެ. ފެބްރުއަރީ 7، 2012 ވަނަ ދުވަހު، ސިފައިންނާއި، ފުލުހުން ނިކުމެ، އޭގެ ފަހުން އޭރުގެ ރައީސް މުހައްމަދު ނަޝީދު ވެރިކަމުން "އިސްތިއުފާ" ދެއްވި ހާލަތަކަށް ގައުމު މިވަނީ ގޮސްފައެވެ.
ފެބްރުއަރީ 7، 2012ގައި ދިވެހި ގައުމަށް ލިބުނު ގެއްލުމުގެ ހިތްދަތި ވޭން ދިވެހިން އަދިވެސް ދަނީ ތަހައްމަލް ކުރަމުންނެވެ. ފެބްރުއަރީ 7 ގެ ހާދިސާއަކީ ތާއިދު ކުރާ ކަމެއް ނޫންކަމަށް ޑިފެންސް މިިނިސްޓަރ މުހައްމަދު ޝަރީފް ވިދާޅުވެފައިވާ އިރު ބަޢާވާތަކަށް ފުރުސަތު ނެތް ކަމަށް ރައީސް އަބްދުﷲ ޔާމީންވެސް ވަނީ ވިދާޅުވެފައެވެ.
ރާއްޖޭގެ ސިޔާސީ މަސްރަހްގައި އިދިކޮޅު ޕާޓީތައް އެކުވެ، ބޮޑު އިއްތިހާދެއް ހަދާފައިވާ އިރު ވެރިކަން ކުރާ ޕީޕީއެމްގެ ތެރޭގައި މިވަނީ ދެ ފެކްޝަނެއް އުފެދިފައެވެ. ޕީޕީއެމްގެ ޒައީމް އަދި 30 އަހަރު މިގައުމަށް ހިދްމަތް ކުރައްވައި ޕީޕީއެމްގެ އާއްމު މެމްބަރުންގެ ފުރިހަމަ ތާއިދު ހޯއްދަވާފައިވާ ރައީސް މައުމޫނާއި މިހާރުގެ ރައީސް އަބްދުﷲ ޔާމީންގެ ގުޅުން މިވަނީ ހައްލުކުރަން ދަތި މިންވަރަކަށް ގޯސްވެފައެވެ.
ވެރިކަން ކުރާ ޕާޓީ ތެރޭގައި އުފެދިފައިވާ ދެ ފެކްޝަނުން ބަހުގެ ހަމަލާ ބަދަލު ކުރަމުން އަންނަ އިރު އަދިވެސް ގިނަ ބައެއްގެ ތާއިދު އޮތީ ކުރީގެ ރައީސް މައުމޫންގެ ފެކްޝަނުގައި ކަމަށް ގިނަ ބަޔަކު ދަނީ ބުނަމުންނެވެ.
ރައީސް މައުމޫން ޕީޕީއެމްއިން ވަކިކުރަން މިހާރުގެ ރައީސް ޔާމީންއަށް ތާއިދު ކުރައްވާ ފަރާތްތަކުން ފަހެއް ނުޖެހޭނެ ކަން ވެސް މިދަނީ ފެންނަމުންނެވެ.
ސިޔާސީ މަސްރަހް ދިރާސާ ކުރާ ފަރާތްތަކުން ބުނާ ގޮތުން، ރައީސް މައުމޫންއަށް އިދިކޮޅު ފަރާތްތަކުން ނުރަސްމީކޮށް ތާއިދު ކުރެއެވެ. އެމަންޒަރުވެސް މިދަނީ ފެންނަމުންނެވެ. އެންމެ ބޮޑު އިދިކޮޅު ޕާޓީގެ މެމްބަރުންގެ ފަރާތުން ރައީސް މައުމޫނަށް ތާއިދު ކުރާކަން ދަނީ ފެންނަމުންނެވެ. އަނެއް ކޮޅުން ރައީސް ޔާމީންއަށް އަމިއްލަ ޕާޓީ ތެރެއިންވެސް ތާއިދު ގެއްލެމުންދާތަން ވެސް ދަނީ ފެންނަމުންނެވެ. ޕީޕީއެމްގެ ބައެއް ފަރާތްތަކުން ފާޅުގައި ރައީސް އަބްދުﷲ ޔާމީންގެ ސަރުކާރަށް ދަނީ ފާޑު ކިޔަމުންނެވެ.
ރައީސް މައުމޫން ޕާޓީން ބޭރުކުރަން މަސައްކަތް ކޮށްފި ނަމަ މި ވެރިކަން ނިމުން ވަރަށް ކައިރިވީއެވެ. ތުރުކީގެ ރައްޔިތުން އުރުދުއާން އާއި އެކު ނިކުންނެވި ގޮތަށް ޕީޕީއެމްގެ މެމްބަރުން ރައީސް މައުމޫން އާއި އެކު ވަކިން ނިކުންނަވާ ހިސާބުން، ރައީސް ޔާމީންގެ ވެރިކަން ނިމޭނެ ކަމަށް ސިޔާސީ ފަރާތްތަކުން ދަނީ ބުނަމުންނެވެ.
ތުރުކީއަށް ސިފައިން ގެންނަން އުޅުނީ ބަޢާވާތެކެވެ. އެކަމަކު ރައިސް މައުމޫން އާއި ރައީސް ޔާމީންގެ ދެމެދުގައި ހިނގަމުންދާ "ފިނި ހަގުރާމަ" އާއި އިދިކޮޅު އިއްތިހާދާއި ބޭރުގެ ޕްރެޝަރު ބޮޑުވެ، ރައީސް ޔާމީންގެ ވެރިކަން ބަލިކަށިވަނީއެވެ. ކޮންމެ ގޮތަކަށް ބެލިނަމަވެސް ގައުމުގެ ކަންކަން މިވަނީ ނާޒުކު ހާލަތެއްގައެވެ. މަޝްވަރާ ރީތި އުސޫލަށް މިވަނީ ރުޖޫއަށް ވާން ޖެހިފައެވެ. ގޮތްދޫކޮށް، ދެކޮޅުވެރިކަން ދޫކޮށް ގައުމު ވެެއްޓެމުން މިދާ ވަޅުގަނޑުން ސަލާމަތް ކުރަންޖެހިއްޖެވެ.