ދިވެހި ރާއްޖޭގައި ފޮޓޯގްރާފީ ކުރިއަރައި ފޮޓޯ ނެގުމަށް ޝައުގުވެރިވާ ޒުވާނުން އުފެދެމުން އަންނަ އިރު ހިތަދު އަށް އުފަން ތަލްއަތް މުހައްމަދަކީ މުޅި ރާއްޖެ އަދި ރާއްޖޭން ބޭރަށް ވެސް ނަން މަޝްހޫރު ފޮޓޯގްރާފަރެކެވެ.
ކުޑައިރުއްސުރެ ކުރެހުމަށާއި އާޓު އަދި ތަރިތަކަށް ޝައުގު ހުންނަ ތަލްއަތަކީ މިވަގުތު ރާއްޖޭގައި ހުރި އެންމެ ހުނަރުވެރި އެސްޓްރޯ ފޮޓޯގްރާފަރެވެ.
"އައްޑޫ ލައިވް" އަށް ދިން ޚާއްސަ އިންޓަވިއުއެއްގައި ތަލްއަތް ވަނީ އޭނާގެ ފޮޓޯގްރާފީ ކެރިއަރު ފެށިގެން އައި ގޮތާއި ކާމިޔާބީތަކުގެ ވާހަކަ ހިއްސާކޮށްފަ އެވެ.
ކުރިން ފޮޓޯ ނެގުމުގައި އެހާ ގިނައިން ވަގުތު ހޭދަކޮށްފައިނުވާ ތަލްއަތު ފޮޓޯގްރާފީގެ ދާއިރާ އަށް ވަދެވުނީ ފޫހި ފިލުވާލަން ކުރެވުނު ކަމެއްގެ ގޮތުގަ އެވެ.
"އެންމެ ކުޑައިރުއްސުރެ ވެސް ކުރަހާހިތްވޭ. އާޓުގެ އެކި ދާއިރާގައި ކުޑައިރުވެސް އުޅެން. އަދި ތަރި ތަކާއި ކައުނު އެއީ ވަރަށް ޝައުގު ހުންނަ ކަމެއް. ތަރިތަކާއި ކައުނާއި ބެހޭ އެކިއެކި ޑޮކިއުމެންޓްރީ މާ ކުރިންވެސް ބަލައި ދިރާސާކޮށް އުޅެން." ފޮޓޯގްރާފީއަށް ވަދެވުނު ގޮތް ކިޔައިދެމުން ތަލްއަތު ކިޔައި ދިނެވެ.
"އެންމެ ފުރަތަމަ ފޮޓޯ ނަގަން ފެށީ ރިސޯޓުގައި އުޅުނު ދުވަސްވަރު. އޭރު ނަގާ އުޅުނީ ފޯނުން. ދެން ނަގާ ފޮޓޯތައް ރިސޯޓުގައި އުޅޭ އެކުވެރިންނަށް ދެއްކުމުން އެ މީހުންނަށް ވަރަށް ކަމުދިޔަ. އަދި އެގޮތަށް އިތުރު ފޮޓޯ ނަގުމަށްވެސް އެދުނު. އެގޮތަށް ފޮޓޯ ނެގުމަށް ޝައުގުވެރިވެގެން ގަތީ އާދައިގެ ނިކޮން ޑީ300 ކެމެރާއެއް. އޭރު ދެން ބޭނުން ކުރަމުން ދިޔައީ އޭތި. އެންމެ ފުރަތަމަވެސް ނަގާ ހިތްވީ ތަރި ތަކުގެ ފޮޓޯ،" ޒުވާން ފޮޓޯގްރާފަރު ބުންޏެވެ. "ދުވަހަކު ނަގަން އުޅެނިކޮށް މިލްކީވޭ ގެ ފޮޓޯއެއް ނެގުނީ. ހަގީގަތަށް ބުނާނަމަ މުޅީން އެނގިގެނެއް ނޫން އެ ފޮޓޯ ނެގުނީ. އެހިސާބުން ވަރަށް ބޮޑަށް ޝައުގު އުފެދުނު. އިންޓަނެޓުން ދަސް ކުރަން ފެށީ."
ރިސޯޓުގައި އުޅެމުން ފޮޓޯ ނެގުމުގައި ބައިވެރިވެ އެކި ގޮތްގޮތަށް މައުލޫމާތު ހޯދައި ދިރާސާކޮށް ތަރިތަކުގެ ފޮޓޯ ނަގައި ދުވަހެއް ދުވަހަކަށް ނެގޭ ޝޮޓު ރަނގަޅު ކުރަމުން ރިސޯޓަށް ދާ ގެސްޓުންގެ ފޮޓޯ ވެސް ނަގާ ހަދައި އުޅުނު ކަމަށް ތަލްއަތު ބުންޏެވެ.
ރިސޯޓު ދުވަސްވަރުގައި ހަ ކައިވެންޏެއްގެ ފޮޓޯގްރާފަރުގެ ގޮތުގައި ތަލްއަތު ވަނީ ބައިވެރިވެފަ އެވެ.
ރިސޯޓުގައި މަސައްކަތް ކުރަމުން ފޮޓޯ ނެގުމަށް ވަގުތު ނުލިބޭތީ ރިސޯޓު ދޫކޮށް އުފަން ރަށް ހިތަދޫ އަށް ތަލްއަ ތުވަނީ އެނބުރި އައިސްފަ އެވެ.
އޭރު އޭނާ ވަނީ އެސްޓްރޯ ފޮޓޯގްރަފީ ނެގުމަށް ވަގުތު ތަކެއް ހޭދަކޮށް އެކަން ކުރިއަށް ވުރެ ރަނގަޅަށް ކުރަން ދަސްކޮށްފަ އެވެ. ނަމަވެސް އޭނާ ދެކޭ ގޮތުގައި އަދިވެސް ދަސް ކުރަން ޖެހޭ ކަންތައް ވަރަށް ގިނަ އެވެ.
ރިސޯޓުން އައުމަށް ފަހު އާ ކެމެރާއެއް ގަންނަން ފައިސާ އެއް ކުރުމަށް ތަލްއަތް ވަނީ ކައިވެނި ހަފްލާތަކާއި އައުޓްޑޯ ޝޫޓިންގ ތަކަށް ގޮސްފައެވެ.
"އެސްޓްރޯ ފޮޓޯގްރަފީގައި އުޅެފައި ޕޯޓްރެއިޓް އަދި އައުޓްޑޯ ނަގަން ފެށުމުން ހީކުރި ވަރަށް ބޮޑު ޗެލެންޖަކަށް އެކަން ނުވި. ވެޑިން ތަށް ޝޫޓް ކުރަން ދިޔައީ އެކަންވެސް ވަރަށް ކުރާ ހިތުން ކުރުމަށް. ވީހާ ވެސް ބޮޑަކަށް ކޮންމެ ޝޫޓެއް ވެސް އެހެން ޝޫޓުތަކާ ތަފާތު ކުރަން މަސައްކަތް ކުރަން. އެކަން ވަރަށް ގިނަ މީހުންނަށް ފާހަގަވެ ކަމުދިޔަ." ވެޑިންގ އަދި އައުޓްޑޯ ޝޫޓިން އާ މެދު ދެކޭ ގޮތް ހުނަރުވެރި ފޮޓޯގްރާފަރު ކިޔައި ދިނީ މިހެންނެވެ.
ފޭސްބުކް ޕޭޖެއް ހަދައި އެއަށް ވެޑިން ފޮޓޯތަކާއި އައުޓްޑޯ ޝޫޓިންގ ތައް އަޕްލޯޑު ކޮށް ވަރަށް ކުޑަ ދުވަސްކޮޅެއްގެ ތެރޭގައި ތަލްއަތް ވަނީ ރާއްޖޭގެ އެކި ހިސާބުތަކަށް މަޝްހޫރުވެފަ އެވެ.
ރާއްޖޭގެ އެކި ކަންކޮޅު ތަކުން ކައިވެނި ހަފްލާތައް ފޮޓޯ ނެގުމަށް ހުށައަޅަމުން ދިޔަ އެވެ.
ފޮޓޯގްރަފީ ކެރިއަރުގައި އެންމެ އުފާވީ ކޮން ދުވަހަކުތޯ ސުވާލު ކުރުމުން ތަލްއަތު ބުނެފައި ވަނީ މިހާތަނަށް އެންމެ އުފާވި ދުވަހަކަށް ހަނދާން ވަނީ އެންމެ ފުރަތަމަ ޝޫޓިން ސްޓާއެއް ނެގުނު ދުވަހެވެ.
އެއީ ވަރަށް އުއްމީދާއެކު ނުކުތް ދުވަހަކަށް ވެފައި އެކަން ހާސިލުވީ ވަރަށް ބުރަ މަސައްކަތުން ކަމަށްވީތީ އެވެ.
ކުރިއަށް އޮތްތަނުގައިވެސް އުފަން އަތޮޅު އައްޑޫ ގެ ރީީތިކަން ދުނިޔެއަށް ހާމަކޮށް އަމިއްލަ ވަޒަން ކުރިއެރުވުމަކީ ވަރަށް ބޮޑަށް ބޭނުންވާ ކަމަކަށް ވެފައި އެކަން ހުއްޓާނުލާނެ ކަމަށް ތަލްއަތު ވަނީ ވައުދުވެފަ އެވެ.
ތަލްއަތުގެ ފޭސްބުކް ޕޭޖަށް ދާދި ފަހުން އަޕްލޯޑު ކުރި 360 ފޮޓޯއެއް ވަނީ ދުނިޔޭގެ އެކި ކަންކޮޅަށް ފެތުރިފަ އެވެ.
އެއް ލައްކަ ފަންސާސް ހަތަރު ހާސް ރިއެކްޝަނާއި 225،000 ޝެއާސް ލިބިފައި ވަނީ އެއްވެސް ކަހަލަ ލާރިއެއް ދީފައި ކުރި ޕްރޮމޯޝަނަކުނެއް ނޫނެވެ.
މި ފޮޓޯގެ ސަބަބުން ދުނިޔޭގެ އެކި ކަންކޮޅުތަކުގެ މީހުންވަނީ ޗުއްޓީއެއް ހޭދަކޮށްލުމަށް އައްޑުއަށް އައުމަށް ކެތްމަދުވެފައިވާ ކަމަށް ބުނެފަ އެވެ.
ފޮޓޯގްރާފީ ދަސްކޮށް ދޭން ޚިޔާލު ކުރާތޯ ކުރި ސުވާލަކަށް ޖަވާބު ދެމުން ތަލްއަތު ބުނެފައި ވަނީ އަދި އެކަހަލަ ވިސްނުމެއް ނެތް ކަމަށެވެ.
"ގަބޫލެއް ނުކުރަން އުނގެނެން ޖެހޭ ވަރަށް އުނގެނުނު ކަމަށް. އަޅުގަނޑުވެސް އަދިވެސް ދަސް ކުރަނީ. ނޭނގޭ އެއްޗެހި ވަރަށް ގިނަ. އެހެންކަމުން ކިޔަވައި ދިނުމުގެ މާބޮޑު ޝައުގުވެރި ކަމެއް އަދި ނެތް. ދަސް ކުރުމަށް ޝައުގު ހުރީ،" ތަލްއަތު ބުންޏެވެ. "އެހެން ނަމަވެސް އަޅުގަނޑަށް އެނގޭ މިންވަރަކުން ސުވާލު ކުރުމުން ކިޔައި ދެން. ފޭސްބުކް ޕޭޖަށް އަޕްލޯޑު ކުރާ ފޮޓޯތަކުގައި ވެސް އަޅުގަނޑު ބޭނުން ކުރާ ހުރިހާ ޓެކްނިކެއް ކެޕްޝަނުގެ ތިރީގައި ލިޔަން."
ނިންމާލަމުން ރާއްޖޭގައި ހުރި އެންމެ މޮޅު ފޮޓޯގްރާފަރު ކަމަށް ގަބޫލު ކުރަންތޯ ކުރި ސުވާލަށް ޖަވާބު ދެމުން ތަލްއަތު ބުނެފައި ވަނީ އޭނާ އަށް ވުރެ މޮޅު ފޮޓޯގްރާފަރުން ރާއްޖޭގައި އަދި އެބަތިބި ކަމަށެވެ.
ނަމަވެސް ރާއްޖޭގައި މިވަގުތު ހުރި އެންމެ މޮޅު އެސްޓްރޯ ފޮޓޯގްރާފަރަކީ ތަލްއަތު ކަމީ ޝައްކެތް އޮތް ކަމެއް ނޫނެވެ.