މިނިވަން ދުވަސް ރާއްޖޭގައި ޖުލައި މަހު 26 ވަނަ ދުވަހު ކޮންމެ އަހަރެއްގައިވެސް ވަރަށް ކުލަގަދަކޮށް ފާހަގަ ކުރާއިރު މިއަހަރުގެ މިނިވަން ދުވަހުގެ އެއްވެސް ހަރަކާތެއްގައި ކުރީގެ ރައީސް މައުމޫން އަބްދުލް ގައްޔޫމް ބައިވެރިވެވަޑައިނުގަންނަވާނެ ކަމަށް ނިންމައި ބޮއިކޮޓްކޮށްފި އެވެ.
މިނިވަން ދުވަހުގެ ދިދަ ނެގުމުގެ ހަފްލާ މިރޭ 11:50 ގައި ޖުމުހޫރީ މައިދާނުގައި ކުރިއަށްދާނެއެވެ. އަދި މިނިވަން ދުވަހުގެ ހާއްސަ ރަސްމިއްޔާތު މާދާމާ ރޭ އިސްލާމީ މަރުކަޒުގައި އޮތްއިރު ދެ ހަފްލާއަށްވެސް މައުމޫނަށްވަނީ ދައުވަތު އަރުވާފައެވެ.
'އައްޑޫލައިވް' އަށް އިތުބާރު ހުރި ފަރާތަކުން މައުލޫމާތު ދެއްވަމުން ވިދާޅުވީ މިއަހަރުގެ މިނިވަން ދުވަހުގެ އެއްވެސް ހަރަކާތެއްގައި މައުމޫން ބައިވެރި ނުވާން ނިންމާފައިވާ ކަމަށާއި އެއީ ކޮން ސަބަބަކާ ލައިގެން ކަމެއް އެމަނިކުފާނު ވިދާޅުވެ ނުލައްވާ ކަމަށެވެ.
ރާއްޖޭގައި މިނިވަން ދުވަސް ފާހަގަ ކުރެއްވުން ބޮއިކޮޓް ކުރައްވައި ރައީސް މައުމޫން ޖުލާން26ގެ ޗުއްޓީކޮޅު ހޭދަކުރަން ނިންމަވާފައިވަނީ ރާއްޖެއިން ބޭރުގައި ކަމަށް މައުލޫމާތު ލިބެއެވެ.
ޕީޕީއެމްގެ ރައީސްގެ މަގާމުވެސް އަދާކުރައްވާ މައުމޫނާއި އެމަނިކުފާނުގެ ކޮއްކޮ ރައީސް ޔާމީނާއި ދެބޭފުޅުންގެ ދެމެދުގައި ދެބަސްވުންތަކެއް އުފެދި ޕާޓީތެރޭގައި ދެފިކުރެއްގެ ބަޔަކު އުފެދި ދެބައިމީހުންގެ ދޭތެރޭ މައްސަލަ ގޯސްވެ ރައީސް ޔާމީނަށް ތާއިދު ކުރާ މަޖިލިސް މެމްބަރުންތަކެއް ވަނީ މައުމޫނާއި ދެކޮޅަށް ސިވިލް ކޯޓަށް މައްސަލަވެސް ހުށައަޅާފައެވެ.