ބޯކޮށް ވިއްސާރަވުމުގެ ސަބަބުން ޕްރީ ސީޒަނުގައި ކުޅޭ އިންޓަނޭޝަނަލް ޗެމްޕިއަންސް ކަޕުގައި މެންޗެސްޓާ ޔުނައިޓެޑާއި ސިޓީ ބައްދަލުކުރަން ހަމަޖެހިފައި އޮތް މެޗު ކެންސެލްކޮށްފިއެވެ.
ފާއިތުވިދުވަސް ތަކުގައި ޗައިނާގެ ބެއިޖިންގ އަށް ހުއްޓުމެއް ނެތި ބޯކޮށް ވިއްސާރަކުރުމުގެ ސަބަބުން ދަނޑުގައި މެޗު ކުރިއަށް ގެންދެވެން ނެތިގެން މިމެޗު ވަނީ މިހާރު ކެންސެލް ކުރެވިފައެވެ.
މުބާރާތުގެ ހޯސްޓުން މެޗު ކުރިއަށް ގެންދަން ބުރަކޮށް މަސައްކަތް ކުރިނަމަވެސް ދެ ޓީމުގެ ކޯޗުން ވަނީ އެއް ވިސްނުމަކަށް އައިސް ކުޅުންތެރިންނަށް ވާރޭގައި މެޗު ނުކުޅެވޭނެ ކަމަށް ނިންމާފައެވެ.
70 މަސައްކަތު މީހުން ކެނޑިނޭޅި ކުރި މަސައްކަތުންވެސް ދަނޑުގައި ފުރިހަމަ މެޗެއް ކުޅެވޭނެ މާހައުލެއް އުފެއްދިފައި ނުވުމުގެ ސަބަބުން ޗައިނާ ގަޑިން 2:30 ގައި ވަނީ މިމެޗު ކުރިއަށް ނުގެންދެވޭނެ ކަމަށް އަންގައި ކެންސެލްކޮށްފައެވެ.
މިމެޗުގެ 50،000 ޓިކެޓު ވަނީ މެޗު ފެށުމުގެ ކުރިން ވިކިފައެވެ. ދެ ޓީމުންވެސް ވަނީ މިހާރު މެޗު ކެންސެލް ވެފައިވާކަން ސޯޝަލް މީޑިޔާ މެދުވެރިކޮށް ކަށަވަރުކޮށްދީފައެވެ.