ސްކޫލްތަކުގެ ހޯލްތަކުގައި ފިލްމް ދައްކާތީ ހިތަދޫ ނޫރުލް އިސްލާމް ޖަމިއްޔާ އިން ކަންބޮޑުވުން ފާޅުކޮށްފި އެވެ.
އެ ޖަމިއްޔާގެ ރައީސް ޝެއިހް މުހައްމަދު އަނީލްގެ ފޭސްބުކް ޕޭޖްގައި މިއަދު ވިދާޅުވީ ސްކޫލްތަކުގެ ހޯލްތައް ފިލްމް ދައްކާ ސިނަމާތަކަށް ބަދަލުވުމުން ދަރިންގެ ތަރުބިއްޔަތު އޮތް ހިސާބު ސާފުވެގެންދާ ކަމަށެވެ.
އައްޑޫގައި މި ފަހަކަށް ދިވެހި ފިލްމްތަކެއް ބައެއް ސްކޫލްތަކުގެ ހޯލްތަކުގައި ދައްކައިފައިވެ އެވެ. އަދި މިއީ އަލަށް ކުރި ކަމެއް ވެސް ނޫނެވެ.
އެންމެ ފަހުން އައްޑޫގައި އެޅުވީ އެމްއެންޑީއެފްގެ ފިލްމް "ހާދަރު" އެވެ. އެ ފިލްމް ހިތަދޫ ޝަރަފުއްދީން ސްކޫލާއި މަރަދޫ އިރުޝާދިއްޔާ ސްކޫލްގެ ހޯލްގައި ދައްކާފައިވެ އެވެ.
އަދި އަލީ ސީޒަންގެ "ވަފާތެރި ކެހިވެރިޔާ" ވެސް އައްޑޫގެ ބައެއް ސްކޫލްތަކުގައި މި އަހަރު ދެއްކި އެވެ.
މީގެ އިތުރުން ޑާކް ރެއިން އެންޓަޓައިންމަންޓްގެ "ވާށޭ މަށާ އެކީ" ގެ ދެ ޝޯ ވެސް ޝަރަފުއްދީން ސްކޫލް ހޯލްގައި ދައްކާފައިވެ އެވެ.
ފިލްމަކީ އާންމުން މުނިފޫހި ފިލުވައިދޭ ވަސީލަތަަކަށްވި ނަމަވެސް އައްޑޫގައި ފިލްމްް އަޅުވާނެ ތަންތަން ނުލިބޭ ކަމަށް ފިލްމް އުފައްދާ ފަރާތްތަކން ބުނެ އެވެ.
ގަމުގެ އަސްޓްރާ ސިނަމާގައި ކުރިން ފިލްމް އެޅުވި ނަމަވެސް އެތަނުގެ ހާލަތު މިހާރު ހުރި ގޮތުން ފިލްމް އަޅުވަން ކުއްޔަށް ދުލެއް ނުކުރެ އެވެ.
އައްޑޫ ސިޓީ ކައުންސިލުން ބުނި ގޮތުގައި މަރަދޫ ބޮޑަގެ ތާރީހީ ބިނާއެއްގެ ގޮތުގައި މިހާރު ތަރައްގީ ކުރަމުން އަންނަ އިރު، އެ ތަނުގައި 200 މީހުންގެ ޖާގައިގެ ސިނަމާއެއް ހުންނާނެ އެވެ.