މައިލޯ އިންޓަ ސްކޫލް ފުޓްބޯޅަ މުބާރާތުގެ 15 އަހަރުން ދަށުގެ އުމުރުފުރާގައި މިއަދު ޝަރަފުއްދީން ސްކޫލާއި ފޭދޫ ސްކޫލް ބައްދަލު ކުރި ފޯރިގަދަ މެޗް 3-0 ލަނޑުން ޝަރަފުއްދީން ސްކޫލް ކާމިޔާބްކޮށްފިއެވެ.
މެޗްގައި ޝަރަފުއްދީނުން ޖެހި 3 ލަނޑުވެސް ޖެހީ އެޓީމްގެ ހަސަން ވިއާމް މަންސޫރުއެވެ. ވިއާމް ޖެހި 3 ލަނޑުގެ ތެރެއިން 2 ލަނޑު ފުރަތަމަ ހާފްގައި ޖެހި އިރު 3 ވަނަ ލަނޑު ޖެހީ ފަހު ހާފްގައެވެ. މެޗްގައި ގިނަ ވަގުތު ބޯޅަ ގެންގުޅެ މޮޅަށް ކުޅެފައިވަނީ ފޭދޫ ސްކޫލުންނެވެ. އެގޮތުން ފޭދޫ ސްކޫލުންވެސް ވަނީ ލަނޑު ޖަހާނެ ރަނގަޅު ފުރުސަތު ލިބި ބޭކާރުވެފައެވެ.
މި މުބާރާތުގައި މާދަމާ ހަވީރު ކުޅޭނީ 13 އަހަރުން ދަށުގެ 2 މެޗެވެ. ފުރަތަމަ މެޗްގައި ބައްދަލު ކުރާނީ ހިތަދޫ ސްކޫލާއި މަރަދޫ ސްކޫލެވެ. ހިތަދޫ ސްކޫލް ވަނީ ކުޅުނު ފުރަތަމަ މެޗް ކާމިޔާބްކޮށްފައެވެ. މަރަދޫ ޓީމްވަނީ ކުޅުނު ދެމެޗުން ވެސް ބަލިވެފައެވެ.
މާދަމާ ހަވީރު ކުޅޭ ދެވަނަ މެޗްގައި ބައްދަލުކުރާނީ މަރަދޫފޭދޫ ސްކޫލާއި ފޭދޫ ސްކޫލެވެ. މި ދެޓީމްވެސް ކުޅުނު ފުރަތަމަ މެޗުން ވަނީ ބަލިވެފައެވެ.