ކުރީގެ ރައީސް މުހައްމަދު ނަޝީދުގެ މައްޗަށް ރާއްޖޭގެ ކޯޓުން އިއްވާފައި ވަނީ ބޭއިންސާފު ޝަރީއަތެއް ކަމާމެދު އެއްވެސް ޝައްކެތް ނެތް ކަމަށް އިމާދު ސޯލިހް ރޭ ވިދާޅުވެއްޖެ އެވެ.
އިދިކޮޅު އިއްތިހާދުން ރޭ ހިތަދޫގައި ބޭއްވި ޖަލްސާގައި އޭނާ ވިދާޅުވީ ޝަރުއީ ކޯޓުން ރައީސް ނަޝީދަށް ލިބުނީ އިންސާފު ކަމަށް ބުނާނެ އެއްވެސް ޖާގައެއް ނެތް ކަމަށެވެ.
"ކާނަލް ނާޒިމާ ދޭތެރޭގައިވެސް ހަމަ އެގޮތަށް، ޝެއިހް އިމްރާނާ ދޭތެރޭވެސް އެގޮތަށް، އަހްމަދު މަހްލޫފާ ދޭތެރޭ ވެސް އެގޮތަށް، އިމާދު ވިދާޅުވި އެވެ.
އިމާދު ވިދާޅުވީ ރައީސް ނަޝީދުގެ ވެރިކަމުގައި ވަޒީރުންގެ މަޖިލީހުން އައްޑޫ ބޭފުޅުންނަށް ޖާގަ ދެއްވި އިރު ރައީސް ޔާމިންގެ ސަރުކާރުގައި މިހާރު އައްޑޫގެ އެއްވެސް ބޭފުޅަކު ވަޒީރުކަމުގައި ނެތް ކަމަށެވެ.
"ހަގީގަތަކީ ރައީސް ނަޝީދުގެ ވެރިކަމުގައި މި އަތޮޅަށް އިސްކަން ދެއްވި މިންވަރަކީ 14 ބޭފުޅުން ތިއްބެވި ކެބިނެޓުގެ ފަސް ވަޒީރުންނަކީ މި އަތޮޅަށް ނިސްބަތްވެވަޑައިގަންނަވާ ބޭފުޅުން،" އޭނާ ވިދާޅުވި އެވެ.
އިމާދު ވިދާޅުވީ އައްޑޫގެ ރައްޔިތުން އެމްޑީޕީ އަށް ތާއިދު ކުރީ ސަބަބެއް އޮވެެގެން ވަރަށް ސާފުކޮށް ފެންނަން އެބަ އޮތް ކަމަށެވެ.
"ޔާމިން މި އަތޮޅުގެ ދަރީންނަށް، މި އަތޮޅު ތަރައްގީއަށް ވިސްނެވި މިންވަރު. އެކަމު ރައީސް ނަޝީދު ފަސް ބޭފުޅުންނަށް ފުރުސަތު ދެއްވި، ފަސް ބޭފުޅުންނަށް ފުރުސަތު ލިބިގެން ދިޔައީމަ ދެއްތޯ؟ ހުޅުދޫ މީދޫގައި ބަނދަރެއް އެޅިގެން ދިޔަ. ފޭދޫގެ ބަނދަރު ހެދިގެން ދިޔަ،" އޭނާ ވިދާޅުވި އެވެ. "ފެނުގެ ނިޒާމް ގާތްގަނޑަކަށް ނިމުމަކާ ހަމައަށް ގެންދެވުނު. ފްލެޓް އެޅުމުގެ ނިޒާމްގެ ތެރެއިން ފޭދޫގައި އެހެން ރަށްރަށުގައި ފްލެޓް އެޅިގެންދިޔަ. ދަތުރުފަތުރުގެ ނިޒާމެއް ފުރަތަމަ ފަހަރަށް ގާއިމުކުރެވި އަގު ހެޔޮކޮން ދަތުރުކުރެވެން ފެށީ އެ ވެރިކަމުގައި."