ގާނޫނު އަސާސީގެ ފުރަތަމަ ބާބުގައި ރައްޔިތުންގެ ބާރު މާނަކޮށްފައިވަނީ މިހެންނެވެ. "
ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މިބާރުތައް ދެމި އޮންނަނީ ރައްޔިތުންގެ ކިބައިގައެވެ".
ގައުމުގެ ކަންތައް ގޯސްވަމުން ގޮސް އެންމެ ފަހުން މިވަނީ ގާނޫނު އަސާސީގެ ފުރަތަމަ ބާބުގައި ބަޔާން ކޮށްފައިވާ ރައްޔިތުންގެ "ބާރު" ކަނޑުވާލާ ހިސާބަށް ގޮސްފައެވެ.
ރައްޔިތުން ގައުމުގެ ކަންކަމަށް ބަސް ބުނުން ހުއްޓުވުމަށް ގަނޫނު އަސާސީގެ 27 ވަނަ މާއްދާ މަރާލުމުގެ މަސައްކަތް ރައްޔިތުންގެ މަންދޫބުން މިވަނީ ފަށާފައެވެ.
ގާނޫނު ހެދުމުގެ ބާރު ގާނޫނު އަސާސީން ރައްޔިތުންގެ މަޖްލިސްއަށް ދީފައިވާ އިރު، މަޖްލިސްގެ މެމްބަރުން ހޮވައި، އެމަޖްލިސް މެމްބަރުން ޒިއްމާދާރު ކުރުވައި، ވެރިކަމުގެ ނިޒާމަށް ރައްޔިތުން ފާރަވެރިވާނެ ނިޒާމެއް މިއަދު ރާއްޖޭގެ ގާނޫނު އަސާސީން ދިވެހިންނަށް މިވަނީ މަގުފަހިކޮށްދީފައެވެ.
ނަމަވެސް މިއަދު ހިތާމައަކީ މަޖްލިސްގެ މެމްބަރުން "ކަރަޕްޝަނާއި ފަސާދައިގެ" ހުތުރު އަވާގައި ޖެހި، ގައުމުގެ ބިން ވިއްކަން ގާނޫނު ފާސްކޮށް، އިއްލާން ކުރުމެއް ނެތި ރާއްޖޭގެ ގުދުރަތީ މުއްސަދިކަން ބޭނުން ބަޔަކަށް ދެވޭނެ ގޮތަށް ގާނޫން ވަނީ ފާސްކޮށްފައެވެ.
އެހުރިހާ ކަމެއް ކޮށް ނިންމައި، މިއަދު މި މަސައްކަތް ފެށީ ރައްޔިތުންގެ ދޫ ބަންދު ކޮށްލުމަށެވެ. ކުރިން ފާސްކުރި ގާނޫނުން ހުޅުވައިދިން ކަރަޕްޝަންގެ ދޮރާށިތަކުން "ރާސްލާފައި" ދަތުރު ނައްޓާލުމުގެ ކުރިން ރައްޔިތުންގެ ދޫ ބަންދުކޮށް، ރައްޔިތު މީހާ ކަނު ކޮށްލަނީއެވެ.
ދެމިލިއަނުން ގުނާލެވޭ އަދަދުން ކުރާ ޖުރިމަނާ އާއި 6 މަސް ދުވަހަށް ޖަލު ގޮޅިއަށް ގެންދަން "އަބުރުގެ ބިލެއް ހަދައި" އެ ފާސް ކުރުމަށް މަސައްކަތް ކުރަމުން ދަނީ ރޯމާ ދުވާލު އެއްވެސް ހަޔާތެއް ނެތް މިންވަރަށެވެ.
އެހެންވެ މިއޮތީ ރައްޔިތުންގެ ވަގުތު އައިސް ޖެހިފައެވެ. މަގު މައްޗަށް ނުނިކުމެވޭ ގޮތަށް ، ފުލުހުން ހުރަސް އެޅިއަސް ގާނޫނު އަސާސީން ރައްޔިތު މީހާއަށް އެފުރުސަތު މިވަނީ ލިބިދީފައެވެ. ފުލުހުންނަކަށް އައިރު ގާނޫނީ އަމުރެއް ނުކުރެވޭނެއެވެ. ފުލުހުންގެ މައްޗަށް އެފަދަ އަމުރެއް ކުރާ ބަޔަކު އެކުރަނީ ގާނޫނާއި ހިލާފް އަމުރެކެވެ.
ގައުމުގެ މިސްރާބު މިހާރު ހުރީ ޖާހިލިއްޔަ ޒަމާނުގެ އުސޫލަށެވެ. ޑިމްކްރަޓިކް ހަމަތައް ދޫކޮށް، ހަރުކަށި، ހުދްމުހުތާރު އުސޫލްތަކަށެވެ. މިކަމުން ގައުމު ސަލާމަތް ކުރެވެން އޮތީ ރައްޔިތުންގެ ބާރު ރައްޔިތުން ބޭނުން ކޮށްގެންނެވެ. ފަރުދީ ޒިއްމާ އަދާކޮށްގެންނެވެ.
މީގެ ދެ އަހަރު ކުރިން ގޭ ދޮރުން ނުނެއްޓި ވޯޓު ހޯދަން ސަލާން ޖަހަން އައި މަޖްލިސް މެމްބަރު ޒިއްމާދާރު ކުރުވައިގެންނެވެ. މަޖްލިސް މެމްބަރަށް ގުޅައި، މެމްބަރަށް ރައްޔިތުންގެ ޝުއޫރު އަޑުއިއްވައިގެންނެވެ. ވަގުތު ފާއިތުވެ ނުދަނީސް ފަރުދީ ޒިއްމާ އަދާކޮށްގެންނެވެ.
ގައުމު ހަމަމަގަށް އެޅުވުމަށް ކޮންމެ ރައްޔިތަކަށް ޒިއްމާއެއްވެއެވެ. އެ ޒިއްމާ ފަސްނުޖެހި އަދާކުރައްވާށެވެ! އަޅުގަނޑުމެންގެ ދަރިންނާއި ދަރީންގެ ކުރިމަގަށްޓަކައެވެ.