ކަރަޕްޝަން ހުއްޓުވަމަށް ހަދަން ޖެހޭ ގާނޫނުތައް ރައްޔިތުންގެ މަޖިލިސް ތެރެއިން ހެދޭނެ ކަމަށް ގަބޫލް ނުކުރައްވާކަމަށް އެންޓި ކަރަޕްޝަން ކަމިޝަން (އޭސީސީ)ގެ ރައީސް ހަސަން ލުޠުފީ ވިދާޅުވެއްޖެއެވެ.
ރާއްޖޭގެ މީޑިއާއަކަށް ދެއްވި އިންޓަވިއުއެއްގައި ހަސަން ލުޠުފީ ވިދާޅުވީ، މަޖްލިސް މެމްބަރުންގެ މައްޗަށް ކަރަޕްޝަންގެ މައްސަލަ ތުހުމަތު ކުރެވޭއިރު، އެމެމްބަރުން މެދުވެރިކޮށް، ކަރަޕްޝަން ހުއްޓުވުމަށް ގާނޫނެއް ހެދޭނެ ކަމަށް ގަބޫލް ނުކުރައްވާ ކަމަށެވެ.
ރައްޔިތުންގެ މަޖިލީހާއި، ސަރުކާރުގެ އިސް ފަރާތްތަކުގެ މައްޗަށް ބޮޑެތި ކަރަޕްޝަންގެ ތުހުމަތު ކުރެވި، އަދި ސަރުކާރުން "އަވަސް" އަރުވާލައިގެން އަބުރު ރައްކާތެރިކުރުމަށް ކަމަށް ބުނެ، މަޖްލިސްއަށް ބިލެއް ވައްދާފައިވާ ވަގުތެއްގައި ހަސަން ލުޠުފީ ވިދާޅުވީ، މަޖްލިސް މެމްބަރުންގެ ނުފޫޒާއި ހެދި ސަރުކާރު ހިންގުމަށް ބޮޑެތި ހުރަސްތަކެއް ކުރިމަތިވަމުން އަންނަ ކަމަށެވެ.
ލުޠުފީ ވިދާޅުވީ، މަޖްލިސް މެމްބަރުންގެ، އުނދަގޫ ނިމިގެން ދިޔަ ދެ ސަރުކާރަށްވެސް ބޮޑު މައްސަލައަކަށް ވިކަމަށެވެ.
ލުޠުފީ ވިދާޅުވީ، ކޮމިޝަން އުފެދުނީއްސުރެ، ކަރަޕްޝަން ހުއްޓުވުމަށް ހަދަން ޖެހޭ ގާނޫނު ހެދުމަށް ބާރު އެޅުއްވި ކަމަށެވެ. ނަމަވެސް އެކަން މަޖްލިސް މެމްބަރުން ނުކުރައްވަނީ އެފަރާތްތަކަށް ބޮޑެތި ކަރަޕްޝަންގެ ތުހުމަތު ކުރެވޭތީ ކަމަށެވެ.
އެގޮތުން ރާއްޖޭން ކަރަޕްޝަން ހުއްޓުވެން އޮތީ މަޖިލިސްއަށް މެމްބަރުން ހޮވުމުގައި ރައްޔިތުން އިތުރަށް ފާރަވެރިވެގެން ކަމަށް ލުޠުފީ ވިދާޅުވިއެވެ.
އޭސީސީން އަންނަނީ ކަރަޕްޝަނަށް މީހުން ހޭލުންތެރިކުރުމުގެ ގޮތުން "ބިތުފަންގި" ނަމުގައި ޕްރޮގްރާމެއް ހިންގަމުންނެވެ.