ޖާގައިގެ ދަތިކަން ހައްލު ކުރަން އޮފީސް އިމާރާތަކާއި ދަރިވަރުންގެ ބްލޮކެއް މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) ގެ ހިތަދޫ ކެމްޕަހުގައި އިމާރާތް ކުރުމަށް 4.6 މިލިއަން ރުފިޔާ އަށް ކުންފުންޏަކާ ހަވާލުކޮށްފިއެވެ.
މި މަޝްރޫއު ހަވާލުކޮށްފައި ވަނީ އެސްޖޭ ކޮންސްޓްރަކްޝަނާ އެވެ.
އެއްބަސްވުމުގައި އެސްޖޭ ކޮންސްޓަރަކްޝަންގެ ފަރާތުން ސޮއި ކުރެއްވީ ކުންފުނީގެ މެނޭޖިން ޑިރެކްޓަރު މުހައްމަދު ޝާހިދެެވެ. އެމްއެންޔޫގެ ފަރާތުން ސޮއި ކުރެއްވީ އެ ޔުނިވާސިޓީގެ ވައިސް ޗާންސެލާ ޑރ. އަލީ ފަވާޒް ޝަރީފެވެ.
އެސްޖޭ ކޮންސްޓްރަކްޝަނާ މަޝްރޫއު ހަވާލު ކުރީ އެއް އަހަރު ދުވަހުގެ ތެރޭގައި ނިންމާ ގޮތަށެވެ.
ޑރ. މުއާވިޔަތު މުހައްމަދު ވިދާޅުވީ ހިތަދޫ ކެމްޕަހުގައި އަޅާ އިމާރާތް ނިމުމުން އެ ކެމްޕަހަށް ދިމާވެފައިވާ ޖާގައިގެ ދަތިކަމަށް ކޮންމެވެސް ވަރެއްގެ ހައްލެއް ލިބިގެން ދާނެ ކަމަށެވެ.
"އިމާރާތަކީ ރަނގަޅު ތައުލީމެއް ފޯރުކޮށް ދިނުމަށް ބޭނުންވާ ވަސީލަތަކަށް ވާތީ އިމާރާތް ވެސް ކުރަނީ،" މުއާވިޔަތު ވިދާޅުވި އެވެ. "މައިގަނޑު ފޯކަސްއަކީ އިމާރާތާއި ވަސީލަތްތަކުން ފެންވަރު ރަނގަޅު ތައުލީމެއް ފޯރުކޮށް ދިނުން."
ހިތަދޫ ކެމްޕަސް މިހާރު ހިންގަމުން އަންނަނީ ހިތަދޫގެ ދެ ސަރަހައްދެއްގަ އެވެ. އެގޮތުން ހިތަދޫ ޝަރަފުއްދީން ސްކޫލް ކައިރީގަ އާއި ލިންކް ރޯޑްގެ އިމާރާތެއްގައި ކެމްޕަސް ހިންގަ އެވެ.
އަދި ހިތަދޫގައި އެމްއެންޔޫގެ ދަނާލެއް ވެސް ހުރެ އެވެ.