އައްޑޫ ސްޓޭޑިއަމްގައި ކުރިއަށްދާ މައިލޯ އިންޓަ ސްކޫލް ފުޓްބޯޅަ މުބާރާތުގެ މިއަދު ހަވީރު ކުޅުނު ފުރަތަމަ މެޗް 4-0 މަރަދޫ ސްކޫލް ކާމިޔާބް ކުރިއިރު ދެވަނަ މެޗް 8-1 އިން މޮޅުވެ، 13 އަހަރުން ދަށުގެ އުމުރުފުރައިން ޝަމްސުއްދީން ސްކޫލް ސެމީ ފައިނަލަށް ދަތުރުކޮށްފި އެވެ.
މިއަދު ކުޅުނު ފުރަތަމަ މެޗްގައި ހުޅުދޫ ސްކޫލް ކޮޅަށް މަރަދޫ ސްކޫލުން ޖެހި 4 ލަނޑުގެ ތެރެއިން 2 ލަނޑު ޖެހީ އަބްދުﷲ ލަސްވާންއެވެ. ދެން ލަނޑު ޖެހީ މުހައްމަދު މާޒިން މޫސާ އާއި އިސްމާއިލް ސިނާން ފަތުހީއެވެ.
ޝަމްސުއްދީން ސްކޫލާއި ފޭދޫ ސްކޫލް ބައްދަލު ކުރި މެޗްގައި ޝަމްސުއްދީން ސްކޫލްގެ ރަޔާން މުއްސަދު ވަނީ 6 ގޯލް ޖަހާފައެވެ.
ދެން އެޓީމަށް ލަނޑު ޖަހައިދިނީ ސަހާފް އާއި ހާމް ހަސީބްއެވެ. ފޭދޫ ސްކޫލްގެ ހަމައެކަނި ލަނޑު ޖެހީ ސިދާމް އަލީއެވެ. ޝަމްސުއްދީން ސްކޫލް ވަނީ މިހާތަނަށް ކުޅުނު ހަތަރު މެޗްވެސް ބޮޑު ތަފާތަކުން މޮޅުވެފައެވެ.
މާދަމާ ކުޅޭނީ 15 އަހަރުން ދަށުގެ މެޗެކެވެ. ބައްދަލު ކުރާނީ އިރުޝާދިއްޔާ ސްކޫލާއި ޝަރަފުއްދީން ސްކޫލެވެ.