މުމި އަހަރު މުދަލުގެ ޒަކާތް ލިބުން ލަސްވެގެން ގިނަ ކައުންސިލްތަކަކުން ކަންބޮޑުވުން ފާޅު ކުރަމުން ދަނިކޮށް ދަލުގެ ޒަކާތް އަންނަ މަހުގެ ތެރޭގައި ބަހަން ފަށާނެ ކަމަށް އިސްލާމިކް މިނިސްޓްރީން ބުނެފި އެވެ.
އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު ވިދާޅުވީ މުދަލުގެ ޒަކާތް ބެހުމަށްޓަކައި އެ މިނިސްޓްރީން ފަޤީރުންގެ ލިސްޓް އަލުން އިސްލާހު ކުރަމުން ގެންދަ ކަމަށެވެ.
ފަގީރުންގެ ލިސްޓް އިސްލާހު ކުރަނީ ޒަކާތް އެންމެ ހައްގުވާ ފަރާތްތަކަށް ޒަކާތް ބެހުމަށް ކަމަށް ވެސް މިނިސްޓަރު ވިދާޅުވި އެވެ.
އިސްލާމިކް މިނިސްޓްރީން ބުނީ، ރާއްޖޭގައި ޒަކާތުގެ ނިސާބު މިހާރު ހުރީ 4،012.60ރ. ގައި ކަމަށެވެ. މުދަލު ޒަކާތަކީ ކޮންމެ އަހަރަކު އެއް ފަހަރު ދައްކަން ޖެހޭ އެއްޗެކެވެ.
އަތޮޅު ތެރޭގައި މުދަލު ޒަކާތް ދޫކުރުން ކުރިއަށް ދާނީ ކައުންސިލްތައް މެދުވެރިކޮށެވެ.