އައްޑޫގައި އިމާރާތް ކުރަން ނިންމާފައިވާ ވަގުފު އިމާރާތުގެ އަމަލީ މަސައްކަތް އަވަސްކޮށް، އެ މަޝްރޫއު ކުރިއަށް ގެންދިއުމުގެ ކަންކަމަށް މަގުފަހި ކުރުމަށް އައްޑޫ ސިޓީ ކައުންސިލުން އިސްލާމިކް މިނިސްޓްރީގައި އެދިއްޖެ އެވެ.
ހިތަދޫގައި ވަގުފު އިމާރާތެއް ހަދަން ނިންމީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގަ އެވެ.
މިކަމަށް ހިތަދޫ ދިރާގު އޮފީސް ކުރިމަތިން 1،500 އަކަފޫޓްގެ ބިމެއް ވެސް ކަނޑައަޅައިފަ އެވެ.
އަދި މި މަޝްރޫއަށް އެހީތެރިކަން ފޯރުކޮށް ދޭ އިސްލާމިކް ޑިވެލޮޕްމަންޓް ބޭންކް (އައިޑީބީ) ގެ ޓީމެއް މިދިޔަ އަހަރު އައްޑު އަށް ޒިޔާރަތްކޮށް، ވަގުފު އިމާރާތް ހަދާ ބިން ބަލައި، މިކަމާ ގުޅޭ މަޝްވަރާތައް ކައުންސިލާ އެކު ވެސް ކޮށްފައިވެ އެވެ.
ކައުންސިލުން ބުނެފައިވާ ގޮތުގައި ވަގުފު އިމާރާތަށް 20 މިލިއަން ރުފިޔާ ވަރު ހަރަދު ވާނެ އެވެ.
ހަތަރު ބުރިއަށް އިމާރާތް ކުރާ އައްޑޫ ވަގުފު ބިނާ ޑިޒައިންކޮށް، ޓެކްނިކަލް ޑީޓެއިލް ޑްރޯވިންގެ މަސައްކަތް ކުރީ އެސް ޕްލަސް އާކިޓެކްޓްސް އިންނެވެ.
އެ ކުންފުންޏާ އެ މަސައްކަތް ހަވާލު ކުރީ ފެބްރުއަރީ 15، 2015 ގަ އެވެ.
އެހެން ނަމަވެސް މިހާތަނަށް އައި އިރު ވެސް މީގެ އަމަލީ މަސައްކަތް ފެށިފައި ނުވާތީ ކައުންސިލުން ދަނީ ކަންބޮޑުވުން ފާޅު ކުރަމުންނެވެ.
މާލޭގައި ހަދަން ނިންމި 10 ބުރީގެ ވަގުފު އިމާރާތް މިހާރު ވަނީ ނިންމައިފަ އެވެ.