ޓެކްނޮލޮޖީ އަށް އަންނަ ކުރިއެރުންތަކާ އެކު، ގުޅުންތަކަށް ވެސް މިހާރު އަންނަނީ ވަރަށް ބޮޑު ލުއި ކަމެއް ހޯދައި ދެމުންނެވެ.
ދުރުގައި އުޅެން ޖެހުނަސް، ފޯނު މެދުވެރިކޮށް މިހާރު ތަފާތު ސޯޝަލް މީޑިއާގެ ވަސީލްތަކާ އެކު އެކަކު އަނެކަކަށް ފެނިގެން ވާހަކަ ދައްކައިލެވެ އެވެ.
މި ފަހަރު މިއޮތީ އަނެއްކާ ވެސް ލޯބިވެރިންނަށް ނުވަތަ ދެމަފިރިންނަށް ހާއްސަ އާ އުފެއްދުމެކެވެ. ޓަޗް އެޗްބީ ރިންގެވެ.
އެހެން ގޮތަކަށް ބުނާ ނަމަ ބައިވެރިޔާގެ ހިތުގެ ވިންދު އިނގިލި ކުރިއަށް ގެނެސްދޭ އަނގޮޓިއެކެވެ.
ބަލާލަން ވެސް ވަރަށް ހިތްގައިމުކޮށް އުފައްދާފައިވާ މި އަނގޮޓި އުފައްދާފައި ވަނީ 100 ވަރަކަށް މާއްދާ ބޭނުންކޮށްގެންނެވެ.
އޭގެ ތެރޭގައި ފިޒިކަލް ފީޑްބެކް މޮނީޓަރަކާއި މަލްޓި ޑައިމެންޝަނަލް މަދަބޯޑް، ސެންސަ ލެޑް އަދި ބެޓެރި ހިމެނެ އެވެ.
މި ހުރިހާ އެއްޗެއް އެކުލެވިގެން ޓަޗް އެޖްބީ ރިންގް ވުޖޫދަށް އައުމުން، މީގެ އަނގޮޓީގެ ޖޯޑެއް ދެ ބައިވެރިންގެ އިނގިލީގައި އަޅައިލުމުން ކިތަންމެ ދުރުގައި ހުރި ނަމަވެސް ދެ މީހުންގެ ހިތުގެ ވިންދު އަނެކަކާ ހަމައަށް ފޯރުވައި ދެ އެވެ.
މިކަންކޮށް ދެނީ މި އަނގޮޓިއަށް ހާއްސަކޮށްފައިވާ މޮބައިލް އެޕްލިކޭޝަނެއް މެދުވެރިކޮށެވެ.
އެ އެޕް ޑައުންލޯޑްކޮށް ދެ މީހުންގެ އަނގޮޓި އެ އެޕް މެދިވެރިކޮށް ގުޅާލުމުން އެކަކަކު އަނެކަކަށް ހިތުގެ ވިންދު އިހުސާސްކޮށް ދޭނެ އެވެ.
ޓަޗް އެޗްބީ ރިންގްގެ ރޯސް ގޮލްޑް އަނގޮޓީ ޖޯޑެއްގެ އަގަކީ 3،000 ޑޮލަރެވެ. މީގެ ސްޓެއިންލެސް ސްޓީލް އަނގޮޓި ޖޯޑެއްގެ އަގަކީ 600 ޑޮލަރެވެ.
މި އުފެއްދުމަށް މި މަހުގެ ދެ ވަނަ ދުވަހުން ފެށިގެން މިހާރު އަންނަނީ ޕްރި އޯޑަ ނަގަމުންނެވެ.
އެހެން ނަމަވެސް ބާޒާރަށް އަނގޮޓި އަންނާނީ އަހަރުގެ ފަހުކޮޅު އެވެ.