މައިލޯ އިންޓަ ސްކޫލް ފުޓްބޯޅަ މުބާރާތުގެ 15 އަހަރުން ތަށުގެ ޗެމްޕިއަންކަން ޝަރަފުއްދީން ސްކޫލުން ހޯދައިފިއެވެ.
ޝަރަފުއްދީން ސްކޫލް ތަށި އުފުލާލީ ފޭދޫ ސްކޫލް 3-1 ލަނޑުން ބަލިކޮށްގެންނެވެ.
މެޗްގެ ފުރަތަމަ ލަނޑު 3 ވަނަ މިނިޓްގައި ޖެހީ ޝަރަފުއްދީން ސްކޫލްއެވެ. މި ލަނޑު ޖެހީ ޝަރުއްދީން ސްކޫލްގެ އަލީ ޝަނީދުއެވެ.
ފުރަތަމަ ހާފް ނިމުނީ 1-0 ލަނޑުން ޝަރަފުއްދީން ސްކޫލް ލީޑްގައި އޮވެއެވެ. ނަމަވެސް ފަހު ހާފްގައި ފޭދޫ ސްކޫލުން މެޗްގެ ކުޅުން ރަނގަޅު ކޮށް 43 ވަނަ މިނިޓްގައި ލަނޑެއް ޖަހާ މެޗްގެ ނަތީޖާ ހަމަހަމަކުރިއެވެ.
ފޭދޫ ސްކޫލްގެ ލަނޑަށް ފަހު ، އެޓީމުން ގިނައިރު ބޯޅަ ކޮންޓްރޯލްކޮށް ކުޅެން ފެށިއެވެ. ގިނަ ބަޔަކު ހީކޮށްގެން ތިބީ މެޗް އެއްވަރުވެގެން ނިމޭނެ ކަމަށެވެ.
ފަހު ހާފް ނިމެން އުޅެނި ކޮށް ޝަރަފުއްދީން ސްކޫލްގެ މެދުތެރެއަށް ކުޅެމުން ދިޔަ އަހްމަދު ހާމީ ނަޖާހް އޭރިއާ ބޭރުން ލިބުނު ހިލޭ ޖެހުން ފޭދޫ ސްކޫލްގެ ގޯލް ކީޕަރު ބޯމަތިން ގޯލަށް ފޮނުވާލައިގެން މެޗްގައި ދެވަނަ ފަހަރަށް ލީޑް ނެގިއެވެ.
މި ލަނޑާއި އެކު ޝަރަފުއްދީން ސްކޫލުން އިތުރު ބަދަލު ގެނެސް މެޗްގެ ލީޑް ފުޅާ ކުރީ 69 ވަނަ މިނިޓްގައި ޖެހި ލަނޑުންނެވެ. އެއާއި އެކު ފޭދޫ ސްކޫލްގެ ކުޅުންތެރިން މާޔޫސްވެގެން ދިޔަތަން ފެނުނެވެ. މުޅި ދަނޑު ގުގުމާފައިވަނީ ޝަރަފުއްދީން ސްކޫލްގެ ސަޕޯޓަރުންގެ އަޑުންނެވެ.
ފައިނަލް މެޗަށް ފަހު މުބާރާތުގެ އެންމެ މޮޅު ކުޅުންތެރިންނާއި، ފެއާ ޕްލޭ ޓީމް އަދި ފެއާޕްލޭ ކުޅުންތެރިޔާގެ އިތުރުން ޗެމްޕިއަން ޓީމާއި، ރަނައަޕް ޓީމަށް ތައްޓާއި މެޑެލް ހަވާލު ކުރުން އޮތެވެ.
ޗެމްޕިއަން ޓީމަށް ތައްޓާއި މެޑެލް ހަވާލްކޮށްދެއްވީ މެޗްގެ ޝަރަފުވެރި މެހްމާން ދިރާގު ސަދަން އޮޕަރޭޝަންސް މެނޭޖަރ އަހްމަދު ނަދީމްއެވެ.
މާދަމާ މުބާރާތުގައި ކުޅޭނީ 13 އަހަރުން ދަށުގެ ފައިނަލް މެޗެވެ. ބައްދަލު ކުރާނީ ޝަރަފުއްދީން ސްކޫލާއި، ޝަމްސުއްދީން ސްކޫލެވެ.