އަތޮޅުތަކުގައި ފޮރެންސިކްގެ ހިދުމަތް ތަރައްޤީ ކުރުމަށް ކުރެވޭ މަސައްކަތުގެ ދަށުން، މާއްދީ ހެކި ފިއުމް ކުރުމުގެ މަސައްކަތަށް ބޭނުންވާ ތަމްރީނުތައް ފުލުހުންގެ ފޮރެންސިކް ސާވިސަސް ޑައިރެކްޓްރޭޓުން ފަށައިފިއެވެ.
އަތޮޅުތަކުގައި ފޮރެންސިކް ޚިދުމަތް ފުޅާ ކުރުމަށް ކުރެވޭ މަސައްކަތުގެ ދަށުން މިއަހަރު އަތޮޅު ތެރޭގައި ތަރައްޤީ ކުރެވޭ ފިންގަޕްރިންޓް ނެގުމުގެ ޚިދުމަތް ހަރުދަނާކަމާއި އެކު ތަރައްޤީ ކުރުމަށް ހޯދިފައިވާ ފިއުމިން ޗެމްބަތައް އަތޮޅުތަކަށް ފޮނުވައި، މިތަކެތި ބޭނުން ކުރުމުގެ ކުރިން އެކަމަށް ބޭނުންވާ ތަމްރީނު ޕްރޮގްރާމްތައް ކުރިޔަށް ގެންދަން ފޮރެންސިކް ސަރވިސަސް ޑައިރެކްޓަރޭޓުން ވަނީ ނިންމައިފަ އެވެ.
އަތޮޅުތަކުގައި ކުރިޔަށް ގެންދަން ހަމަޖެހިފައިވާ ތަމްރީނުގެ ފުރަތަމަ ޕްރޮގްރާމް ކުރިއަށް ގެންގޮސްފައި ވަނީ ސައުތު ސެންޓަރަލް ޕޮލިސް ޑިވިޝަންގަ އެވެ.
މި ތަމްރީނު ޕްރޮގްރާމުގައި ބައިވެރިވެފައި ވަނީ ސައުތު ސެންޓަރަލް ޕޮލިސް ޑިވިޝަންގައި މަސައްކަތް ކުރާ ފޮރެންސިކް ސަރވިސަސް ޑައިރެކްޓަރޭޓުގެ މުއައްޒަފުންނެވެ.
ތިއަރީ ކުލާހަކާއި، ޕްރެކްޓިކަލް ސެޝަންއެއް ހިމެނޭ ގޮތަށް ކުރިއަށް ގެންދާ މި ތަމްރީނު ޕްރޮގްރާމުގައި މަޢުލޫމާތު ދެއްވީ ސެންޓްރަލް އެވިޑެންސް ރެސްޕޮންސް ޔުނިޓްގެ ހެޑް ސަބް އިންސްޕެކްޓަރ އޮފް ޕޮލިސް އަފްރާ އާދަމާއި ފިންގަޕްރިންޓް ލެބޯޓަރީގައި މަސައްކަތް ކުރައްވާ ފިންގަޕްރިންޓް އެގްޒަމިނަ ޕޮލިސް ކޯޕްރަލް އާދަމް ހަލީމެވެ.
ފޮރެންސިކް ސާވިސަަސް ޑައިރެކްޓްރޭޓުން ހަމަޖައްސާފައި ވަނީ އަތޮޅުތަކުގައި މި ޚިދުމަތް ފެށުމުގެ ކުރިން އެކަމަށް ބޭނުންވާ މީހުން ތަމްރީނުކޮށް ނިންމުމަށެވެ.
އަތޮޅުތަކުގައި ފޮރެންސިކް ޚިދުމަތް ފުޅާކޮށް މާއްދީ ހެކި ނެގުމަށް ބޭނުންވާ ތައްޔާރީތައް މާލެއެކޭ އެއްގޮތަށް ގެންދިއުމަށްޓަކައި ކުރަންޖެހޭ މަސައްކަތްތައް މޯލްޑިވްސް ޕޮލިސް ސާވިސްއިން ދަނީ ކުރަމުންނެވެ.
އެގޮތުން އައްޑު އާއި ކުލުދުއްފުށީގެ އިތުރުން ބައެއް އެހެން އަތޮޅުތަކުގައި ވެސް ފޮރެންސިކް ސާވިސްގެ ބައެއް ޚިދުމަތްތައް ވަނީ ފަށައިފަ އެވެ.