ރައީސުލްޖުމްހޫރިއްޔާގެ އަނބިކަނބަލުން ފާތިމަތު އިބްރާހިމް ދީދީ ހިންގަވާ ސަދަގާތު ފައުންޑޭޝަނާއި ގުޅިގެން އުރީދޫ މޯލްޑިވްސް އިން ރާއްޖޭގެ 25 ސަރަހައްދެއްގައި ކޮމަޕިއުޓަރު ސިސްޓަމާއި އިންޓަނެޓުގެ ޚިދުމަތް ލިބޭ ގޮތަށް ހުންނާނެ ޓެލެސެންޓަރުތަކެއް، ގާއިމު ކުރުމުގެ މަސައްކަތް ފަށައިފި އެވެ.
އުރީދޫގެ 11 ވަނަ އަހަރީ ދުވަހާ ގުޅިގެން، ކުޑަކުދިން ޓެކްނޮލޮޖީއާ އަހުލުވެރިކުރުވުމުގެ ގޮތުން މިއަދު ކުޑަކުދިންގެ ބަގީޗާގައި ކުރިޔަށް ގެންދިޔަ ހަވީރެއްގައި، އުރީދޫ މޯލްޑިވްސްގެ ފަރާތުން ސަދަގާތު ފައުންޑޭޝަނަށް ވަނީ 25 ކޮމްޕިއުޓަރު ސިސްޓަމް ހަދިޔާ ކޮށްފަ އެވެ.
އުރީދޫ މޯލްޑިވްސްގެ އެސިސްޓަންޓް މެނޭޖަރ ޕަބްލިކް ރިލޭޝަންސް ނޫރާ އިބްރާހިމް ޒާހިރު އާއި ހަވާލާދީ ބައެއް މީޑިޔާ ތަކުގައި ރިޕޯޓްކޮށްފައިވާ ގޮތުގައި އިންޓަނެޓުގެ ޚިދުމަތް ލިބޭ ކޮމްޕިއުޓަރު ސިސްޓަމަތަކަކާ އެކު ރާއްޖޭގެ 25 ސަރަހައްދެއްގައި ގާއިމުކުރެވޭ 25 ޓެލެސެންޓަރަކީ، ކޮންމެ ފަރާތަކަށް ވެސް އެއްވެސް ޚަރަދަކާ ނުލައި ކޮމްޕިއުޓަރާއި އިންޓަނެޓު މެދުވެރިކޮށް ޑިޖިޓަލް ހުނަރު ދަސްކުރެވޭ ގޮތަށް ގާއިމުކުރާ ތަންތަން ކަމަށެވެ.
މިއަދު ބޭއްވި ރަސްމިއްޔާތުގައި އުރީދޫއިން ވަނީ، އިންޓަނެޓުގެ ޚިދުމަތް އެންމެ ބޮޑަށް ބޭނުންވާ 500 ފަރާތަކަށް އެ ޚިދުމަތް ފޯރުކޮށް ދިނުމަށްޓަކައި، އެއް އަހަރުގެ ޑޭޓާ ޕްލޭނަކާ އެކު އުރީދޫގެ 500 އިންޓަނެޓު ޑޮންގަލް ވެސް ސަދަގާތު ފައުންޑޭޝަނާ ހަވާލުކޮށްފަ އެވެ.
މައުލޫމާތު ލިބިފައިވާ ގޮތުގައި އުރީދޫއިން ހަދިޔާކުރި ކޮމްޕިއުޓަރު ސިސްޓަމްތަކާއި އިންޓަނެޓު ޚިދުމަތާއި އެކު ޓެލެސެންޓަރުތައް ގާއިމުކުރާނެ ސަރަހައްދުތައް އަދި 500 އިންޓަނެޓު ޑޮންގަލް ހަދިޔާ ކުރާނެ ފަރާތްތައް ކަނޑައަޅާނީ ސަދަގާތު ފައުންޑޭޝަނުންނެވެ.
މެޑަމް ފާތުން ހިންގަވާ ޞަދަގާތު ފައުންޑޭޝަނަކީ ނިކަމެތިންނާއި ހާއްސަ އެހީއަށް ބޭނުންވާ ފަރާތްތަކަށް ވެސް ވަރަށް ގިނަ އެހީތައް ވަމުން އަންނަ ޖަމިއްޔާއެކެވެ.
މީގެ އިތުރުން އިޖްތިމާޢީ ކަންކަމުގައި ވެސް ވަރަށް ފާހަގަކޮށްލެވޭ ޖަމިއްޔާއެކެވެ.
އެގޮތުން ރާއްޖޭގެ ރައްޔިތުންނަށް ހިލޭ ބެހުމަށް ސައުދީ އަރަބިއްޔާގެ ސަރުކާރުން ހަދިޔާކުރި ކަދުރު ބެހުމުގެ މަސައްކަތް ވެސް ސަދަގާތު ފައުންޑޭޝަން އިން ކޮށްފައިވާ ކަން ފާހަގަކޮށްލެވެ އެވެ.