ރިއޯ އޮލިމްޕިކްސް 2016 ގައި ފިރިހެނުންގެ ފުޓުބޯޅައިގެ ފައިނަލުގައި ޖަރުމަނު ބަލިކޮށް ބްރެޒިލް ރަން މެޑަލް ހޯދައިފިއެވެ.
މެޗުގެ ފުރިހަމަ ވަގުތު ހަމަވިއިރު 1-1 އިން ނަތީޖާ އެއްވަރުވެ ބްރެޒިލް މެޗު ކާމިޔާބުކޮށްފައިވަނީ އިތުރު ވަގުތުގައިވެސް ނަތީޖާއަށް ބަދަލެއް ނުގެނެވި ޕެނަލްޓީއަށް ގޮސްގެނެވެ.
ފުރަތަމަ ހާފުގެ 27 ވަނަ މިނެޓުގައި ނޭމާ ވަނީ ބްރެޒިލްއަށް ލީޑު ނަގާދީފައެވެ. ދެވަނަ ހާފުގައި ޖަރުމަނުވިލާތުގެ ޒުވާން ކުޅުންތެރިޔާ މެކްސް މެޔާ ވަނީ ނަތީޖާ އެއްވަރުކޮށްފައެވެ.
2014 ވަނަ އަހަރު އަމިއްލަ ގައުމުގައި ބޭއްވި ވޯލްޑް ކަޕުގެ ސެމީ ފައިނަލުގައި ޖަރުމަނާއި ވާދަކޮށް ބްރެޒިލް ވަނީ 1-7 ގެ ބޮޑު ނަތީޖާއިން ބަލިވެފައެވެ. އެއަށްފަހު ޓީމުގެ ހާލަތު ރަނގަޅު ނުވެވި އޮވެ، އޮލިމްޕިކްސް އަށް ނިކުމެފައިވަނީވެސް ވަރަށް ބޮޑެތި ގޮންޖެހުންތަކާއެކީއެވެ.
މުބާރާތުގެ ތެރެއިން ކެޕްޓަން ނޭމާއަށް ސަޕޯޓަރުންގެ ފަރާތުން ކުރިމަތިވި ގޮންޖެހުންތަކުގެ ސަބަބުން ގައުމީ ޓީމަށް ކުޅުން ހުއްޓާލަން ވިސްނާ ކަމަށްވެސް ހާމަކޮށްފައިވެއެވެ.
ނަމަވެސް ގޮންޖެހުންތަކާއެކީ ކުޅެ ނޭމާ ވަނީ ބްރެޒިލްއަށް ފުރަތަމަ ފަހަރަށް އޮލިމްޕިކްސް މެންސް ފުޓްބޯލް އިން ރަން މެޑަލް ހާސިލުކުރުމަށް ކެޕްޓަންގެ ރޯލު ފުރިހަމައަށް އަދާކޮށްފައެވެ.
މެޗަށް ފަހު ނޭމާ، 24، ވަނީ ބްރެޒިލްގެ 23 އަހަރުން ދަށުގެ ޓީމުގެ ކެޕްޓަން ކަން ދޫކޮށްލާފައެވެ.