މަސްތުވާތަކެތި ޓްރެފިކް ކުރި އައްޑޫ މީހަކު 75,000 ރުފިޔާ އިން ޖޫރިމަނާކޮށް 12 އަހަރު ދުވަހުގެ މުއްދަތަށް ޖަލަށް ލުމަށް މަރަދޫފޭދޫ މެޖިސްޓްރޭޓް ކޯޓުން ޙުކުމްކޮށްފި އެވެ.
މަސްތުވާތަކެތި ޓްރެފިކް ކުރުމުގެ ކުށް ސާބިތުވުމާއި ގުޅިގެން ޙުކުމްކޮށްފައި ވަނީ މަރަދޫފޭދޫ، މާކަރީލައިޓް ޢަލީ އަޙްސަން، 24، ގެ މައްޗަށެވެ.
އޭނާ މައްޗަށް މަސްތުވާތަކެތި ޓްރެފިކް ކުރުމުގެ ދަޢުވާ އުފުލާފައިވަނީ ޖޫން 14، 2014 ގައި ފޭދޫން މީދޫ އަށް ދިޔަ ފެރީއަކުން އޭނާ ފޭބި ވަގުތު މަސްތުގެ ހާލަތުގައި ހުރިކަމަށް ތުހުމަތު ކުރެވިގެން ފުލުހުންގެ ބެލުމުގެ ދަށަށް ގެންގޮސް، ބަލައި ފާސްކުރި އިރު ލައިގެން ހުރި ބޮކްސާ ތެރެއިން މަސްތުވާތަކެތި ހުރި ނުވަ ރަބަރު ޕެކެޓް ފެނުނު މައްސަލަ އާ ގުޅިގެންނެވެ.
މަސްތުވާތަކެތި ޓްރެފިކް ކުރުމުގެ ދަޢުވާގައި އަޙްސަންގެ އިޢުތިރާފުން ޝަރީޢަތަށް ސާބިތުވާތީ، ކުށުގެ އުޤޫބާތެއްގެ 12 އަހަރަށް ޖަލަށް ލުމަށް ޙުކުމްކޮށް 75،000ރ، ޖޫރިމަނާކޮށް އެ ފައިސާ އެއް މަސް ދުވަހުގެ ތެރޭގައި މަރަދޫފޭދޫ މެޖިސްޓްރޭޓް ކޯޓަށް ދެއްކުމަށް އަންގާ ކަމަށް އެ ކޯޓުގެ ޤަޟިއްޔާގައިވެ އެވެ.