މިމަހު 13 ވަނަ ދުވަހު ފުވައްމުލަކު ފަރަށް އެރި ވިއެޓްނާމްގެ އާގު ބޯޓު "އެމްވީ އެންޖީއޯސީ ސަން" އަދިވެސް ފުންކުރެވިފައިނުވާ ކަމަށް މައުލޫމާތު ލިބިއްޖެއެވެ.
ބޯޓު ފުންކުރުމަށް ޓްރާންސްޕޯޓް އޮތޯރިޓީއިން ދީފައިވާ 15 ދުވަސް މާދަމާ އަށް ހަމަވާއިރު އަދިވެސް ބޯޓު ފުންނުކުރެވިގެން އުޅެނީ އެކަންކުރުމަށް ބޭނުންވާ ވަރުގެ ބޮޑު އުޅަނދެއް ނުލިބިގެންކަމަށް އެ އޮޓޯރިޓީއިން މިއަދު މައުލޫމާތުދީފައިވެއެވެ.
ފުވައްމުލަކުގައި ގާއިމުކުރުމަށް ހަމަޖެހިފައިވާ ފެނާއި ނަރުދަމާގެ މަސައްކަތް ކުރުމަށް ގެނައި ހިލައާއި ހިލަވެލި ހިފައިގެން ދިޔަ މި ބޯޓު ފަރަށް އަރާފައިވަނީ ރަށަށް ކައިރިކޮށް ނަގިލިއަޅަން ޕޮއިންޓެއް ހޯދަމުން ދަނިކޮށްކަމަށް މައުލޫމާތު ލިބިފައިވެއެވެ.
ބޯޓު ފަރަށްއެރިއިރު ބޯޓުގައި 20 ފަޅުވެރިންނާއި 5700 ޖަމްބޯ ބޭގުގެ ހިލަ އަދި ހިލަވެލި ބޯޓުގައި އެބަތިބިއެވެ. ޓްރާންސްޕޯޓް މިނިސްޓްރީ އިން މައުލޫމާތު ދީފައިވާގޮތުން ބޯޓުން މިހާރު މަސައްކަތް ކުރަނީ ބޯޓުގައި ހުރި މުދާތައް ހުސްކުރުމަށްފަހު ބޯޓު ފުންކުރެވޭތޯއެވެ.
ޓްރާންސްޕޯޓް އޮތޯރިޓީގެ އަބްދުއް ރަޝީދު ނާފިޒް ވިދާޅުވެފައިވަނީ ބޯޓު ފުންކުރެވޭވަރުގެ ބޮޑު ބޯޓެއް ނުލިބުމުން ކޮޅުވެއްޓިއެއް ނުވަތަ ހެލިކޮޕްޓަރެއްގެ އެހީގައި ބޯޓުގައި ތިބި މުދާ ހުސްކުރުމުގެ މަސައްކަތް މިހާރު ބޯޓުން ދަނީ ކުރަމުންނެވެ.
"ދޯނިތައް ކައިރިކުރެވޭ ވަރަށް މާ ގަދައީ އެ ސަރަހައްދު. އެ މީހުން ވިސްނުން ބޮޑަށް ހުރީ ކޮޅުވެއްޓިއެއް ގެނެސްގެން މުދާތައް ހުސް ކުރުމުގެ މަސައްކަތް ކުރަން،" ނާފިޒު މައުލޫމާތު ދީފައިވެއެވެ.
އަދި ދީފައިވާ 15 ދުވަހުގެ މުއްދަތުގެ ތެރޭގައި އެމީހުންނަށް ފުން ނުކުރެވޭ ކަމަށްވާނަމަ، ކުރިމަތިވި ދަތިތައް ޓްރާންސްޕޯޓް އޮތޯރިޓީއަށް ހުށަހަޅަން އަންގާފައިވާނެ ކަމަށެވެ. އަދި އެކަށީގެންވާ ސަބަބެއް ދެއްކިއްޖެނަމަ، ބޯޓު ފުން ކުރަން ދިން މުހުލަތު އިތުރު ކުރާނެ ކަމަށް ވެސް އޭނާ ވިދާޅުވި އެވެ.
ނަމަވެސް މުއްދަތުގެ ތެރޭގައި ފުންކުރެވުނަސް، ނުކުރެވުނަސް، ބޯޓު ޖޫރިމަނާ ކުރެވޭނެ ކަމަށް ނާފިޒް ވިދާޅުވިއެވެ. އެކަމަކު ޖޫރިމަނާ ކުރެވޭ އަދަދު ކަނޑައެޅޭނީ ބޯޓު ފުން ކުރުމުން، ފަރަށް ލިބުނު ގެއްލުމާ ގުޅޭ ރިޕޯޓު ތައްޔާރު ކުރުމުން ކަމަށާއި ތިމާވެއްޓަށް ލިބުނު ގެއްލުމުގެ ބަދަލު ހޯދާނެ ކަމަށް ނާފިޒު ވިދާޅުވި އެވެ.
ފަރުމައްޗަށް އެރި ބޯޓު 10 ފޫޓާ ހަމައަށް ބީހިފައި އޮތްއިރު، އެއަށްވުރެ ބޮޑަށް ބޯޓު ބީހިގެން ހިނގައިދާނެ ކަމަށް ޚަބަރު ލިބެއެވެ. އަދި ބޯޓު ފަރަށް އަރާފައިވަނީ އެރަށުގެ ޑައިވަރުންގެ މެދުގައި ވަރަށް މަގުބޫލު ޑައިވިން ޕޮއިންޓެއްގައެވެ. މިހާދިސާއާ ގުޅިގެން ޑައިވްޕޮއިންޓަށާއި ފަރަށް ލިބިދާނެ ގެއްލުމަކަށް އެރަށު ޑައިވަރުން ތިބީ ކަންބޮޑުވެފައެވެ.