ދުނިޔޭގެ ބައެއް ގައުމު ތަކުގައި ވެސް އޮންނަ އުސޫލުން ވައިބާ އަދި ފޭސްބުކް ރާއްޖެއިން ބަންދު ކުރެވިދާނެކަމަށް ވިލުފުށީ ދާއިރާގެ މެމްބަރު ރިޔާޒް ރަޝީދު ވިދާޅުވެއްޖެ އެވެ.
ސަރުކާރު ހަފްތާއެއްހާ ދުވަހުގެ ތެރޭގައި ވައްޓާލަން ރާވާފައިވާކަމަށް ބީބީސީން ރިޕޯޓްކޮށްފައިވަނިކޮށް، ރޭ ސަންގު ޓީވީގެ "ހަބަރަށްފަހު" ޕްރޮގްރާމްގައި ވާހަކަފުޅު ދައްކަވަމުން ރިޔާޒު ވިދާޅުވީ، ޗައިނާ ފަދަ ގައުމުތަކުގައިވެސް ގޫގުލް ފަދަ ސައިޓްތައް ބްލޮކް ކޮށްފައިވާ ކަމަށާއި، ބައެއް އެހެނިހެން ގައުމުތަކުން ފޭސްބުކަށް ނުވަދެވޭ ގޮތް ހަދާފައިވާ ކަމަށެވެ. އަދި އެގޮތަށް ރާއްޖެއިންވެސް އެސައިޓްތައް ބްލޮކް ކުރެވިދާނެކަމުގެ އިންޒާރު ރިޔާޒް ރަޝީދު ވަނީ ދެއްވާފައެވެ.
ރިޔާޒް ވިދާޅުވީ އަލްޖަޒީރާއިން ރާއްޖެއާއި ގުޅޭ ގޮތުން ދޮގު މައުލޫމާތެއް ފަތުރައިފިނަމަ ، ގާނޫނެއް ފާސްކޮށްގެން ނަމަވެސް އެޗެނަލް ރާއްޖެއަށް ނުފެންނަ ގޮތް ހެދިދާނެ ކަމަށެވެ.
ޕްރޮގްރާމްގައި ރިޔާޒް ވަނީ އަވައްޓެރި ލަންކާއަށްވެސް އިންޒާރު ދެއްވާފައެވެ. ރިޔާޒް ވިދާޅުވީ، ލަންކާގެ ދާހިލީ ހަނގުރާމައިން އަރައިގަތުމަށް ދިވެހިން ދެއްވި އެހީތެރިކަން ހަނދާން ނައްތާލައިގެން ނުވާނެކަމަށާއި، ދާދިފަހުން ލަންކާއަށް ކުރިމަތިވި ފެނުގެ ކާރިސާއަށްވެސް ދިވެހި ރާއްޖެއިން ބޮޑު އެހީތެރިކަމެއް ވެދެއްވި ކަމަށެވެ.
ރިޔާޒު ވިދާޅުވީ ލަންކާގެ ދާހިލީ ހަނގުރާމަގައި ހިނގިކަމަށް ބުނާ އިންސާނިއްޔަތާއި ހިލާފް ކަންކަން ތަހްގީގު ކުރުމަށް ކުރި މަސައްކަތް ނާކާމިޔާބު ކޮށްލުމުފައިވެސް ދިވެހި ސަރުކާރުން އިސްދައުރެއް އަދާކުރިކަމަށެވެ.
އަދި ރާއްޖޭގެ އިގްތިސާދު ފުނޑިގެންދާތަން ބަލަން ޗައިނާ ފަދަ ބޮޑެތި ގައުމުތަކުން ނުތިބޭނެކަމަށް ރިޔާޒު ވިދާޅުވިއެވެ،"'
މީގެ އިތުރުން ރާއްޖޭގެ އިގްތިސާދު ފުނޑިގެންދާއިރު، އޭގެ އަސަރު ލަންކާއަށް ކުރާނެކަމަށް ރިޔާޒު ވިދާޅުވިއެވެ.
ރިޔާޒު ލަންކާއަށް އިންޒާރުދީފައި މިވަނީ ކުރިގެ ރައީސް މުހައްމަދު ނަޝީދު ލަންކާގައި ކުރައްވާ މަސައްކަތްޕުޅުތަކަކީ ލަންކާ ސަރުކާރުން ކަންބޮޑުވާ ކަމެއް ނޫންކަމަށް އެގައުމުން ބުނެފައި ވަނިކޮށެވެ.