ބިރު ދެއްކުމުގެ ކުށް ސާބިތުވި ފޭދޫ މީހަކު ހަ މަސް ޖަލަށްލުމަށް ފޭދޫ މެޖިސްޓްރޭޓް ކޯޓުން ޙުކުމްކޮށްފި އެވެ.
ބިރު ދެއްކުމުގެ ކުށް ސާބިތުވީ ފޭދޫ، ރަތްކެލާގެ އަހުމަދު އަރީޝް، 28، ގެ މައްޗަށެވެ.
އަރީޝްގެ މައްޗަށް ބިރުދެއްކުމުގެ ކުށުގެ ދަޢުވާ އުފުލާފައި ވަނީ ޖޫން 18، 2014 ވަނަ ދުވަހު ގަން ޕޮލިސް ސްޓޭޝަނުން ބަލަމުން ދިޔަ މައްސަލައަކާ ގުޅިގެން އައްޑޫ ސިޓީ ޕޮލިސް ކަސްޓޯޑިއަލް އަށް ހާޒިރުކޮށްފައި ހުއްޓައި ފުލުހަކާ ދެމެދު ހިނގި ހަމަނުޖެހުމެއްގައި އެ ފުލުސް މީހާ މަރާލާނެ ކަމަށް ބުނެ އިންޒާރު ދިން މައްސަލަ އާ ގުޅިގެންނެވެ.
މި ދަޢުވާ ބެލުމަށްފަހު ފޭދޫ މެޖިސްޓްރޭޓް ކޯޓުން ކޮށްފައިވާ ޙުކުމްގައި ބުނަނީ ދަޢުލަތުން އަރީޝްގެ މައްޗަށް ކޮށްފައިވާ ދަޢުވާއަށް އިންކާރުކޮށްފައިވީ ނަމަވެސް ހެކީންގެ ހެކި ބަހުން އޭނާގެ މައްޗަށް ބިރު ދެއްކުމުގެ ކުށް ޝަރީޢަތަށް ސާބިތުވާ ކަމަށެވެ.