އިނގިރޭސި ވިލާތަށް ރެފިއުޖީންގެ ގޮތުގައި އަރާ އެތައް ސަތޭކަ ކުޑަކުދިން ގެއްލި އިންސާނުން ވަގަށް ނެގުމުގެ މައްސަލަ ބޮޑުވެ އާއިލާތައް ބިރުވެރިކަމުގެ ތެރެއަށް ވެއްޓެން ފަށައިފިއެވެ.
ހިއުމަން ޓްރެފިކިންގ ނުވަތަ އިންސާނުން ވަގަށް ނަގައި އަޅުންގެ ގޮތުގައި ވިއްކައި، ހަށި ވިއްކުމަށް މަޖުބޫރުކުރުން ފަދަ ލާއިންސާނީ އަމަލުތަކުގައި އިނގިރޭސި ވިލާތުގައި އެންމެ ފަހުގެ ޝިކާރައަކަށް ވެފައިވަނީ ރެފިއުޖީ ކުޑަކުދިންނެވެ.
އިނގިރޭސި ކަމާބެހޭ ފަރާތްތަކާ ހަވާލާދީ 'ދަ އިންޑެޕެންޑެންޓް' އިން ރިޕޯޓުކޮށްފައިވާގޮތުގައި 360 ކުޑަކުދިންނެއް ގައުމަށް އެރުމަށްފަހު ވީނުވީ އެއް ނޭނގި ވަނީ ގެއްލިފައެވެ. އަދި ފާއިތުވި ދެއަހަރު ތެރޭގައި 200 އަށްވުރެ ގިނަ ކުދިން ގެއްލިފައިވާ ކަމަށް ހާމަކޮށްފައިވެއެވެ.
ގައުމުގެ އިދިކޮޅު ސިޔާސީ ފަރާތްތަކާއި މަޖިލިސް މެމްބަރުން ވަނީ ހޯމް އޮފީހުގެ އިދާރާއިން އާންމުކުރި އަދަދު ތަކަށް ބަލާއިރު ބޮޑު ވަޒީރު، ތެރޭސާ މޭ ވަނީ ކުޑަކުދިންނަށް ސަލާމަތްކަމެއް ނެތް ކަމަށް ބުނެ އަޑުއުފުލަމުންނެވެ.
އިނގިރޭސި ވިލާތުގައި ކުޑަކުދިން ގެއްލި ނުވަތަ ވަގަށް ނެގުން ސަމާލުވާންޖެހޭ މިންވަރަކަށް އިތުރުވެފައިވުމުން ގައުމުގެ އެންމެހާ ކަމާބެހޭ ފަރާތްތަކަށް އިތުރަށް ސަމާލުވުމަށް އަންގައި ކުދިން ހޯދުމަށް ހާއްސަ ޓާސްކް ފޯސްތަކެއް އެކުލަވާލުމުގެ މަސައްކަތް ސަރުކާރުން ވަނީ ފަށާފައެވެ.