ރާއްޖޭގެ އެންމެ ގިނަ ދުވަސްވީ ސްކޫލް، މަޖީދިއްޔާ ސްކޫލްގެ މިދިޔަ އަހަރުގެ އެންމެ މޮޅު ތިން ދަރިވަރުންނަކަށް އައްޑޫގެ ތިން ދަރިވަރުން ހޮވިއްޖެ އެވެ.
މަޖީދިއްޔާ ސްކޫލުން ހޮވި އެންމެ މޮޅު ދަރިވަރަކަށް ހޮވިފައިވަނީ މިދިޔަ އަހަރު އެސްކޫލްގެ ކެޕްޓަންކަންވެސް ކުރި، ހިތަދޫ، ނައިމީމަންޒިލް މިޝަލް މުހައްމަދު ނައީމެވެ.
މިޝަލް ވަނީ ކޮމްޕިއުޓާ ސައިންސް އިން ދުނިޔެއިން ހަތް ވަނަ އަދި ރާއްޖޭން އެއްވަނަ ހޯދައިގެން ރާއްޖޭގެ ގަދަ 10 ގެ ވަނަ އަށް އަރައިފަ އެވެ.
މަޖީދިއްޔަ ސްކޫލުން ހުރިހާ ގޮތަކުން ދެވަނަ އަށް ގޮސްފައި ވަނީ މީދޫ ސްވީޓްޕީ ކޮޓެޖް، އަހްމަދު ބާސިލް ޝިޔާމެވެ. އަދި ހުރިހާ ގޮތަކުން ތިން ވަނަ ދަރިވަރަކަށް ހޮވިފައި ވަނީ ހުޅުދޫ، ދީދާރުގެ، އިބްރާހިމް ދާއޫދު މުހައްމަދު ހައްސާނެވެ.
ރޭ އޮލިމްޕަހުގައި ބޭއްވި ރަސްމިއްޔާތުގައި އެންމެ މޮޅު ދަރިވަރަށް އިނާމް ހަވާލުކޮށް ދެއްވީ ޝަރަފްވެރި މެހުމާން ސިވިލް ސާވިސް ކަމިޝަންގެ ރައީސް ޑރ. އަލީ ޝަމީމެވެ.
ރޭގެ ރަސްމިއްޔާތުގައި ވާހަކަ ދައްކަމުން މިޝަލް ބުނީ އެންމެ މޮޅު ދަރިވަރަކަށް ހޮވުމަކީ ތައުލީމީ ހަޔާތުގައި އައި އެންމެ އުފާވެރި ރޭ ކަމަށާއި އެ ކާމިޔާބީ އަކީ ސާނަވީ ތައުލީމީ ހަޔާތުގައި ހާސިލް ނުކުރެވި އިން ހަމައެކަނި ޝަރަފް ކަމަށެވެ.
މަޖީދިއްޔާ ސްކޫލުން ޖީސީއީ އޯލެވެލްގައި 151 ދަރިވަރުން މިދިޔަ އަހަރު ބައިވެރި ކުރި އިރު އޭގެ ތެރެއިން ގަދަ 10 ގައި 26 ދަރިވަރަކު ހިމެނުނު އިރު 1 ވަނަ ފަސް ދަރިވަރަކު ވަނީ ހޯދާފައެވެ.