ރާއްޖޭގެ އޮންލައިން ނޫހެއް ކަމަށްވާ މޯލްޑިވްސް އިންޑެޕެންޑެންޓުގެ އޮފީސް ހުންނަ އިމާރާތަށް ފުލުހުން ވަދެއްޖެއެވެ.
ނޫހުގެ އެޑިޓަރު، ޒަހީނާ ރަޝީދު ކުރެއްވި ޓުވީޓެއްގައި ބުނެފައިވަނީ ފުލުހުން ވަނީ މޯލްޑިވްސް އިންޑެޕެންޑެންޓު ހިންގާ އިމާރާތުގެ ތެރެއަށް މިހާރު ވަދެފައެވެ.
Maldives police are raiding the building that houses @IndependentMV offices #StealingParadise
— Zaheena Rasheed 🎈 (@ZaheenaR) September 7, 2016
ޒަހީނާ ވަނީ އަލްޖަޒީރާ އިން ނެރުނު ސަރުކާރުގެ ކޮރަޕްޝަން ހާމަކޮށްފައިވާ ޑޮކިއުމެންޓަރީ، "ސްޓީލިން ޕެރެޑައިސް" އަށް މޯލްޑިވްސް އިންޑެޕެންޑެންޓުގެ އެޑިޓަރުގެ ހައިސިއްޔަތުން އިންޓަވިއު ދީފައެވެ.
ފުލުހުން އެއިމާރާތް ފާސްކޮށްފައިވަނީ ދިވެހިރާއްޖޭގައި ގާނޫނީ ގޮތުން އުފެދިފައި އޮތް ސަރުކާރު ވައްޓާލުމަށް މީހުންގެ އެހީތެރިކަން ހޯދާ ދައުލަތުގެ މުއައްސަސާތަކުގައްޔާއި އާންމު ރައްޔިތުންގެ މެދުގައި ފިތުނަ ފަސާދަ އުފައްދާ، މާލެ ތެރޭގެ އާއްމު މަސްލަހަތު ނަގާލައި މާލެ ތެރޭގައި ހަމަނުޖެހުން ހިންގުމަށް ރާވަމުންދާކަމުގެ ތުހުމަތުގައެވެ.
ފުލުހުން ވަނީ މިހާރު މޯލްޑިވްސް އިންޑެޕެންޑެންޓު ހިންގާ ފަންގިފިލާ ދޫކޮށް އެހެން ތަންތަން ފާސްކުރަން ފަށާފައެވެ. އެފަންގިފިލާއިން ފުލުހުންނަށް ބޭނުންތެރި އެއްވެސް މައުލޫމާތެއް ހޯދިފައިނުވާކަމަށް މައުލޫމާތު ލިބިފައިވެއެވެ.