އައްޑޫގައި ހަދަމުން އަންނަ ފްލެޓްތަކަށް ކުރިމަތިލި މީހުންގެ ފޯމްތައް އިވެލުއޭޓް ކުރުމުގެ މަސައްކަތް ކުރިއަށްދާ ކަމަށާއި އަންނަ މަހުގެ ތެރޭގައި ގުތުއަތުލުން ބާއްވާނެ ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީގެ އައްޑޫ ކޯޑިނޭޓަރު މުހައްމަދު ފައިސަލް ވިދާޅުވީ އިވެލުއޭޝަންް ނުނިމި ލަސްވީ ފޯމްތައް ގިނަވެގެން ކަމަށެވެ. އެކަމަކު އެ މަސައްކަތް މިހާރު ވަރަށް ބާރަށް ކުރިއަށްދާ ކަމަށް ވިދާޅުވި އެވެ.
ފައިސަލް ވިދާޅުވީ އިވެލުއޭޝަން ނިންމުމަށް ފަހު، ގުރުއަތަށް ދާ މީހުންގެ މެދުގައި ގުރުލުން ބާއްވާނީ އަންނަ މަހުގެ ތެރޭގައި ކަމަށެވެ.
އެކަމަކު ވަކި ތާރީހެއް އަދި ހަމައެއްނުޖައްސަ އެވެ.
ފައިސަލް ވިދާޅުވީ ގުރުލުން ބޭއްވުމަށް ފަހު، ފްލެޓްތައް ލިބޭ ފަރާތްތަކާ އެތަންތަން ހަވާލު ކުރެވޭނީ ނޮވެމްބަރު މަހުގެ ތެރޭގައި ކަމަށެވެ.
ހިތަދު އާއި ހުޅުމީދޫގައި ހަދާ ފްލެޓްތަކުގެ ތެރެއިން ބައެއް ފްލެޓްތަކަށް ކުރިމަތިލާން ޖޫން މަހުގެ 5 ވަނަ ދުވަހު ހުޅުވާލައި ޖުލައި މަހުގެ 10 އަށް މުއްދަތު ހަމަވި އިރު ޖުމްލަ 585 ފޯމް ހުށަހަޅާފައިވެ އެވެ.
ފްލެޓަށް އެދި ހިތަދޫން 448 ފޯމް ހުށަހަޅާފައިވާ އިރު ފޭދޫން 71 ފޯމް ހުށަހަޅާފައިވެ އެވެ. އަދި މަރަދު އާއި މަރަދޫފޭދޫން 54 ފޯމް ހުށަހަޅާފައިވެ އެވެ. ހުޅުމީދޫން ހުށަހަޅާފައި ވަނީ 12 ފޯމެވެ.
ހިތަދޫގައި 264 ފްލެޓް ހަދާ އިރު ފުރަތަމަ ހުޅުވާލީ 230 ފްލެޓަށެވެ. ހުޅުމީދޫގައި 48 ފްލެޓް ހަދާ އިރު ފުރަތަމަ ހުޅުވާލީ 38 ފްލެޓަށެވެ.
ފްލެޓްތަކަށް ޑައުންޕޭމަންޓްގެ ގޮތުގައި 25،000ރ. ދައްކަން ޖެހެ އެވެ. އަދި މަހު ކުއްޔަކީ 3،000ރ. އެވެ.