ކާމިޔާބު ފިލްމުތަކެއް ކުޅެފައިވާ ބޮލީވުޑްގެ ކުރީގެ މަޝްހޫރު ބަތަލާ ޕޫނަމް ދިލަންގެ ކްލޯތިން ލައިންގައި ހިމެނޭ ހެދުންތަކާ އެކު މާދަމާ މާލޭގައި ފެއާއެއް ބާއްވަން ނިންމައިފި އެވެ.
މި ފެއާ އޮންނާނީ މާދަމާ ހެނދުނު 10:00 އިން ފެށިގެން ރޭގަނޑު 11:00 އާ ހަމައަށް ދަރުބާރުގޭގަ އެވެ.
ފެއާ އަށް ޕޫނަމް ވެސް މާލެ އަންނާނެ އެވެ. އޭނާގެ މި ހެދުން ފެއާ އިންތިޒާމު ކުރަނީ ޕޫނަމްގެ ރާއްޖޭގެ ގާތް ރަހުމަތްތެރިއެއް ކަމަށްވާ އައިމިނަތު އިބްރާހީމްދީދީ (އައިމިނައިދީ) އެވެ.
އޭނާ ބުނީ ފެއާގައި ޕޫނަމްގެ ކަލެކްޝަންގައި ހިމެނޭ ގިނަ ޑިޒައިންތަކުގެ ހެދުންތައް ދައްކާލާނެ ކަމަށެވެ.
ފެއާ އަށް ޕޫނަމް ރާއްޖެ އަންނަ އިރު އޭނާއަކީ ރާއްޖެ އަށް އެއްގޮތަކަށް ވެސް ބީރައްޓެހި ބަތަލާއެއް ނޫނެވެ.
ޕޫނަމްގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ "ސަމަންދަރު" އަކީ ރާއްޖޭގައި ވަރަށް ބޮޑު ބައި ޝޫޓްކޮށްފައިވާ ފިލްމެކެވެ. ސަނީ ޑިއޯލް އާ އެކު ޕޫނަމް ކުޅުނު އެ ފިލްމް ރިލީޒް ކުރީ 1986 ގަ އެވެ.
މިހާރު އުމުރުން 54 އަހަރުގެ ބަތަލާ އަދި ދެ ކުދިންގެ މަންމަ ޕޫނަމްގެ ފާހަަގަކޮށްލެވޭ އިތުރު ފިލްމުތަކުގެ ތެރޭގައި "ޔެ ވާދާ ރަހާ"، "ނޫރީ" އަދި "ޓްރިޝުލް" ފަދަ ފިލްމުތައް ފާހަގަކޮށްލެވެ އެވެ،