އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ބަޔާން ކުރާ ގޮތަށް ސިޓީއެއްގެ ދަރަޖަ ދެވޭ ތަންތަނުގައި ހުންނަން ޖެހޭ ހިދުމަތްތައް ލޯކަލް ގަވަރުމަންޓް އޮތޯރިޓީ (އެލްޖީއޭ) އިން ކަނޑައަޅައި އާންމުކޮށްފި އެވެ.
އެލްޖީއޭ އިން އާންމުކޮށްފައިވާ އުސޫލުގައި ވަނީ ސިޓީއެއްގެ ދަރަޖަ ދެވޭ ތަންތަނުން ލިބެން ހުންނަންޖެހޭ ހިދުމަތްތަކާއި، އުފެއްދުންތެރިކަމުގެ ޖުމްލަ ނިސްބަތް ހުންނަން ޖެހޭ މިންވަރު ވެސް ކަނޑައަޅައިފަ އެވެ.
އެގޮތުން ސިޓީއެއްގެ ދަރަޖަ ދެވޭ ރަށެއްގައި ނުވަތަ ސިޓީއެއް އަދި ސަރަހައްދެއްގައި އުމްރާނީ ގޮތުން ބަލާ އިރު އެފަދަ ތަންތަނަށް އެކަށީގެންވާ ފެންވަރުގެ ހިދުމަތްތައް ލިބެން ހުންނަން ޖެހޭނެ ކަމަށް ބުނެފައިވެ އެވެ.
އާއްމު ހިދުމަތަށް ބަލާ އިރު އިސްލާމީ ޝިއާރު ފާޅު ކުރުމާއި، އިޖުތިމާއީ ކަންކަމަށް ބޭނުންވާ ވަސީލަތްތަކާއި، ސިއްހީ ހިދުމަތާއި، ތައުލީމާއި ތަމްރީނަށް ބޭނުންވާނެ ވަސީލަތްތައް ހުންނަންޖެހޭނެ ކަމަށާއި އަދި އެއްގަމާއި ކަނޑުދަތުރުފަތުގެ ނިޒާމް ހަމަޖެހި އެ ސަރަހައްދަކުން ނުވަތަ ދުރުނޫން ހިސާބަކުން ވައިގެ ދަތުރުތަކަށް ބޭނުންވާ ވަސީލަތްތައް ހުންނަން ޖެހޭ ކަމަށް ވެސް
މީގެ އިތުރަށް ބޯހިޔާވަހިކަމާއި ޔުޓިލިޓީޒް ހިދުމަތްތަކާއި، އިޖުތިމާއީ ރައްކާތެރިކަމަށް ބޭނުންވާ ހިދުމަތްތަކާއި އަދި އާންމު ސަލާމަތާއި ރައްކާތެރިކަން ކަށަވަރު ކުރެވޭނެ ގޮތްތައްވެސް ގާއިމުވެފައި ހުންނަން ޖެހޭނެ ކަމަށްވެސް އުސޫލުގައިވެ އެވެ.
އުފެއްދުންތެރިކަމުގެ ޖުމްލަ ނިސްބަތް، ސިޓީއެއްގެ ދަރަޖަ ދެވޭ ރަށެއްގައި ނުވަތަ ސިޓީއެއް އަދި ސަރަހައްދެއްގައި އުމްރާނީ ގޮތުން ބަލާ އިރު އެތަނެއްގެ އާބާދީއާއި އަދި އިގްތިސޯދީ ސިނާއީ ފުރުސަތުތަކަށް ބިނާކޮށް އުފެއްދުންތެރިކަމުގެ އެވުރެޖު ނިސްބަތް ގައުމީ މިންގަނޑާއި އަޅާބަލާ އިރު އެކަށީގެންވާ މިންވަރެއްގައި ހުންނަން ޖެހޭނެ ކަމަށް ވެސް އުސޫލުގައި ވަނީ ބުނެފަ އެެވެ.
ރާއްޖޭގައި މިހާރު ސިޓީގެ ދަރަޖަ ރަސްމީ ހައިސިއްޔަތަކުން ދީފައި އޮންނަނީ ދެ ތަނަކަށެވެ. އެއީ ވެރި ރަށް މާލެ އާއި އައްޑު އެވެ.
ގދ. ތިނަދޫ ސިޓީއެއްގެ ގޮތުގައި ތަރައްގީ ކުރަން ސަރުކާރުން ނިންމާފައިވާ އިރު، ފުވައްމުލަކު އަތޮޅު ކައުންސިލުން ވަނީ އެ ރަށަށް ވެސް ސިޓީ ދަރަޖަ ދިނުމަށް ގަރާރެއް ފާސްކޮށްފަ އެވެ.