ހުޅުމީދޫ ނަރުދަމާ ނިޒާމް ގާއިމު ކުރާނެ ބަޔަކު ހޯދަން ކުރިން ހުޅުވާލި ބީލަން ބާތިލްކޮށް، އެ މަސައްކަތް ކުރާނެ ބަޔަކު ހޯދަން އަލުން ބީލަމަށް ހުޅުވާލައިފި އެވެ.
މި މަސައްކަތްތަކުގެ ތެރޭގައި ހިމެނެނީ ނަރުދަމާ ވިޔުގަ ގާއިމު ކުރުމާއި، ލިފްޓިން ސްޓޭޝަނާއި ޕަމްޕް ސްޓޭޝަންސް އަދި ސީ އައުޓް ފޯލް ގާއިމު ކުރުމާއި، ސްވޭޖް ޓްރީޓްމަންޓް ޕްލާންޓް ގާއިމު ކުރުމުގެ މަސައްކަތެވެ.
ފިނޭންސް މިނިސްޓްރީން ބުނީ ހުޅުމީދޫ ނަރުދަމާ ނިޒާމް ގާއިމުކޮށް ދޭން ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު އަންނަ މަހުގެ 23 ވަނަ ދުވަހާ ހަމައަށް މިހާރު ވަނީ ހުޅުވާލައިފަ އެވެ.
ބީލަމުގައި ބައިވެރިވާން ރެޖިސްޓްރޭޝަން ފީއެއްގެ ގޮތުގައި 1،500ރ. ދައްކަން ޖެހެ އެވެ.
މި މަޝްރޫއުގެ ބިޑް ސެކިއުރިޓީގެ ގޮތުގައި 462،600ރ. ހުށަހަޅަން ޖެހެ އެވެ.
ބިޑް ސެކިޔުރިޓީގެ މުއްދަތަކީ ބިޑް ހުށަހަޅާ ތާރީޚުން ފެށިގެން 148 ދުވަހެވެ. ޕަފޯމަންސް ސެކިޔުރިޓީގެ ގޮތުގައި ހުށަހަޅަން ޖެހޭނީ ކޮންޓްރެކްޓް އަގުގެ 10 ޕަސަންޓެވެ. އެޑްވާންސް ޕޭމަންޓްގެ ގޮތުގައި ކޮންޓްރެކްޓް އަގުގެ 15 ޕަސަންޓް އެޑްވާންސް ޕޭމަންޓް ގެރެންޓީއެއް ހުށަހެޅުމުން ލިބޭނެ ކަމަށް މިނިސްޓްރީން ބުންޏެވެ.
ފިނޭންސުން ބުނީ ހުޅުމީދޫ ނަރުދަމާ މަޝްރޫއުގެ ޕްރީބިޑް މީޓިން މި މަހުގެ 27 ގައި އޮންނާނެ ކަމަށާއި ބިޑް ހުޅުވާނީ އަންނަ މަހުގެ 25 ގައި ކަމަށެވެ.
ހުޅުމީދޫ ނަރުދަމާ މަޝްރޫއަކީ އޯޕެކް ފަންޑް ފޮ އިންޓަނޭޝަނަލް ޑިވެލޮޕްމަންޓް (އޮފިޑް) އިން ދިވެހި ސަރުކާރަށް ލޯނު އެހީގައި ލިބިފައިވާ ފައިސާ އިން ހިންގާ މަޝްރޫއެކެވެ.
މިދިޔަ ހަފުތާގައި އެންވަޔަރަމަންޓް މިނިސްޓްރީން ވަނީ ހިތަދޫގެ ނަރުދަމާ ނިޒާމް ފުރިހަމަ ކުރަން އެމްޑަބްލިއުއެސްސީ އާ ހަވާލުކޮށްފަ އެވެ.