ސޯޝަލް މީޑިއާއަކީ މިހާރު އެއާ ނުލައި އުޅެވޭ ވަރުގެ އެއްޗަކަށް ނުވެ އެވެ. މީގައި ބޮޑު މީހެއް ކުޑަކުއްޖެއް ތަފާތެއް ނެތެވެ. ފޭސްބުކާއި ޓްވިިޓާ އަދި އިސްޓަގްރާމް ފަދަ ޕްލެޓްފޯމަތަކަށް އެތައް ބަޔަކު މިހާރު ވަނީ ދެވި ހިފައިފަ އެވެެ.
މީގެ ސަބަބުން ދިމާވާ އިޖުތިމާއީ ގިނަ މައްސަލަތަކެއް ވެސް އެބަ ހުއްޓެވެ.
އެއް ކަމަކީ އާންމުންގެ ތެރެއަަށް ނުކުމެ ސޯޝަލައިޒް ވާން މިހާރު ގިނަ ބަޔަކަށް ވަގުތު ނުވުމެވެ.
އެފަދަ މީހުން އަބަދު ވެސް ތިބޭނީ އިންނެޓްގެ ދުނިޔެ އަށް ގެއްލިފަ އެވެ.
ފަހުގެ ދިރާސާއަކުން މިހާރު ހާމަވި ގޮތުގައި އާންމުކޮށް ފޭސްބުކާއި އިސްޓަގްރާމް ފަދަ ވަސީލަތްތައް ބޭނުން ކުރާ ކުޑަކުދިން އެ މީހުންގެ މައިންބަފައިންނާ އަރާރުންވެ ޒުވާބުކޮށް ހަދަ އެވެ.
އެކަން އެގޮތަށް ދިމާވަނީ ސޯޝަލް މީޑިއާތަކުން ފެންނަ "ރީތި" މީސްމީހުންގެ ފޮޓޯ ފަދަ އެއްޗެހި ފެނި، އެފަދަ ރީތި ކަމެއް ތިމާ އަށް ލިބިފައި ނުވާ ކަމަށް ގަބޫލް ކުރެވި އުގެދޭ އުދާސްތަކުގެ ތެެރެއިންނެވެ.
އިނގިރޭސިވިލާތުގެ އެސެކްސް ޔުނިވަސިޓީން 10-15 އަހަރާ ދެމެދުގެ 3،500 ކުދިން ބައިވެރިކޮށްގެން ހެދި ދިރާސާގައި ބުނަނީ ސޯޝަލް މިޑިއާތަކުގެ ދަލުގައި ޖެހި ތިމާގެ ބުރަސޫރަ އާ މެދު ހިތްހަމަނުޖެހިގެން ޝަކުވާ ކުރާ ކުދިންގެ 47 ޕަސަންޓަށް އަރަ އެވެ.
ސޯޝަލް މީޑިއާތައް ބޭނުން ކުރިޔަސް ތިމާގެ އަމިއްލަ ނަފުސާ ދޭތެެރޭ ހިތްހަމަޖެހޭ ކަމަށް ބުނަނީ 53 ޕަސަންޓް ކުދިންނެވެ. މި ނަމްބަރުތަކަށް ބަލާ އިރު މިއީ ކަންބޮޑުވާން ޖެހޭ ކަމެކެެވެ.
ދިރާސާގައި އަދި ބުނަނީ އެއްގޮތަކަށް ވެސް ސޯޝަލް މީޑިއާ ބޭނުން ނުކުރާ ކުދިން 82 ޕަސަންޓް އެ މީހުންގެ އަމިއްލަ ނަފުސާ ދޭތެރޭ ހިތްހަމަޖެހޭ ކަމަށެވެ.
ތިމާގެ ސިފަ އާ މެދު ހިތްހަމަނުޖެހި، އެއީ މައިންބަފައިންގެ ސަބަބުންވީ ކަމެއް ކަމަށް ގަބޫލް ކުރެވިގެން ކުޑަކުދިން މައިންބަފައިންނާ ޒުވާބު ކުރުން ފަދަ އަހުލާގީ މައްސަލަަތައް ކުރިމަތިވާ ނަމަ، ސޯޝަލް މީޑިއާގެ ނުރައްކާތެރިކަން ކުޑަކުދިންނަށް ވަރަށް ބޮޑުކަން ސާބިތުވެ އެވެ.