އައްޑޫގެ ތާރު މަގުތަކުން ނެގި ސްޕީޑް ބްރޭކަރުތައް ނަގާފައި ވަނިކޮށް އަލުން އެ ތަކެތި އަޅަން ފަށައިފި އެވެ.
އެކަމަކ މި ފަހަރު ސްޕީޑް ބްރޭކަރު އަޅަނީ މުޅިން ތަފާތުކޮށެވެ.
ހައުސިން މިނިސްޓްރީގެ އައްޑޫ ކޯޑިނޭޓަރު މުހައްމަދު ފައިސަލް ވިދާޅުވީ މިހާރު ސްޕީޑް ބްރޭކަރުތައް އަޅަމުން އަންނަނީ ކުރިން އެޅި ތަންތަނުން ތާރު ފަށަލަ ނެގުމަށް ފަހު، އެތަނުގައި ކޮންކްރިޓް ފަށަލައެއް އެޅުމަށް ފަހު އޭގެ މަތީގައި ކަމަށެވެ.
އެގޮތަށް ބްރޭކަރުތައް އަޅަން ނިންމީ ކުރިއަށް ވުރެ ވަރުގަދަކޮށް، ރަނގަޅަށް އެކަން ކުރަން ކަމަށް އޭނާ ވިދާޅުވި އެވެ.
ފައިސަލް ވިދާޅުވީ ކުރިން ތާރުގަނޑުމަތީގައި އެޅި ބްރޭކަރުތައް އެހާ އަވަހަށް އަދި ފަސޭހަ އިން ނެއްޓުނީ ތާރުގަނޑު ހޫނުވުމުން ބްރޭކަރު ހަރު ކުރަން ޖަހާފައިވާ އިސްކުރުތައް ދޫވެ ނެއްޓިގެން ކަމަށެވެ.
ބްރޭކަރުތައް މިދިޔަ ހަފުތާގައި ހައުސިން މިނިސްޓްރީގެ އެންގުމަށް އެމްއާރްޑީސީން ނެގުމަށް ފަހު، މިހާރު އަލުން އަޅަމުން އަންނަ އިރު މި މަަަސައްކަތް ނިންމާލަން 30 ދުވަސް ނަގާނެ ކަމަށް މިނިސްޓްރީން ބުންޏެވެ.
ބްރޭކަރުތައް އަލުން އަަޅަން ފެށީ އިއްޔެ އެވެ.