ހުޅުމީދޫ ކަނޑޮފިށި ކުޅި ހިމެނޭ ސަރަޙައްދުގައި އަލިފާން ރޯވެ އަނދަމުންދާތީ އަލިފާންގަނޑު ނިއްވާލުމުގެ މަސައްކަތުގައި ފުލުހުން ޙަރަކާތްތެރިވާން ފަށައިފި އެވެ.
އެސަރަޙައްދުގައި އަލިފާން ރޯވެފައިވާ ކަމުގެ މައުލޫމާތު ހުޅުމީދޫ ޕޮލިސް ސްޓޭޝަނަށް ލިބިފައިވަނީ މިއަދު 6:27 ހާއިރު ކަމަށް ފުލުހުން ބުންޏެވެ.
އެ މަޢުލޫމާތު ލިބުމާއެކު އެ ސަރަޙައްދަށް ގޮސް އަލިފާން ގަނޑު ނިއްވާލުމުގެ މަސައްކަތް ފުލުހުން ވަނީ ފަށައިިފަ އެވެ. މި މަސައްކަތުގައި ފުލުހުންނާއެކު ރައްޔިތުންގެ ތެރެއިން ބަޔަކު ވެސް އަންނަނީ ޙަރަކާތްތެރިވަމުންނެވެ.
ފުލުހުންނާ ރައްޔިތުން ގުޅިގެން ކުރި މަސައްކަތުން މިހާރު އަލިފާންގަނޑު ކޮންޓްރޯލް ކުރެވެން ފަށާފައިވާ ކަމަށް ފުލުހުން ބުނެ އެވެ.
ފުލުހުންގެ އައްޑޫ ސިޓީ ކޮމާންޑަރު ވިދާޅުވީ އެ ސަރަޙައްދުގައި އަލިފާން ރޯވާން މެދުވެރިވި ސަބަބު ބަލަމުން ގެންދާ ކަމަށާއި މި ޙާދިސާގައި އެއްވެސް މީހަކަށް އަނިޔާއެއް ލިބުނުކަމުގެ މަޢުލޫމާތު ލިބިފައިނުވާ ކަމަށެވެ.
އަދިއި މީހެއްގެ ގޯތި ގެދޮރަށް ވެސް ގެއްލުމެއް ލިބިފައި ނުވާ ކަމަށެވެ.