ހިތަދޫގެ ދެ ގްރޫޕެއްގެ ދެމެދުގައި މިރޭ ހިނގި މާރާމާރީއެއްގައި ޒަހަމްވި 5 މީހަކަށް ހިތަދޫ ރީޖަނަލް ހޮސްޕިޓަލުން ފަރުވާ ދެމުން އެބަގެންދެއެވެ.
ފުލުހުންގެ މީޑިއާ އޮފިޝަލް މިރޭ "އައްޑޫލައިވް"އަށް ވިދާޅުވީ މާރާމާރީގެ މައްސަލަ ހިތަދޫ ޕޮލިސް ސްޓޭޝަނަށް ހުށަހަޅާފައިވަނީ މިރޭ 10:45 ހާއިރު ކަމަށެވެ.
މި ހާދިސާ އާއި ގުޅިގެން ޒަހަމްވި މީހުންނަށް ފަރުވާ ދެމުން އަންނަ އިރު އޭގެތެރެއިން އެކެއްގެ ކަރަށް ތޫނު އެއްޗަކުން ހަމަލާ ދީފައިވާ ކަމަށް ހޮސްޕިޓަލް ސަރަހައްދުގައި ހުރި މީހަކު ވަނީ "އައްޑޫލައިވް'އަށް މައުލޫމާތު ދީފައެވެ.
މިހާދިސާގައި ޒަހަމްވި މީހުންނަށް ލިބުނު ގެއްލުމުގެ ތަފްސީލް އަދި ވަނީ ލިބޭ ގޮތް ނުވެފައެވެ.
ފުލުހުން ބުނީ މާރާމާރީ އާއި ގުޅިގެން ރަށުތެރެ ބެލެހެއްޓުމުގެ "ހާއްސަ އޮޕަރޭޝަނެއް" މިހާރު ފަށާފައިވާ ކަމަށެވެ. އަދި މައްސަލަ އިތުރަށް ތަހްގީގު ކުރަމުން އަންނަ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
މިރޭ ހިތަދޫގައި މާރާމާރީ ހިންގާފައި މިވަނީ ރަށުތެރޭގައި ޖަހާފައިވާ މަގު ބައްތިތައް ނިއްވާލާފައި އޮތުމާއި ގުޅިގެން ރަށުތެރެ އަނދިރިވެ ވަރަށް ބޮޑަށް ނާމާން ވެފައި ވަނިކޮށެވެ.