އައްޑޫގެ ގިނަ ބަޔަކަށް މުހައްމަދު ރިޔާޒު (ރިޔާ) އެނގޭނީ ރެސްޓޯރަންޓެއް ހިންގާ މީހެއްގެ ގޮތުގަ އެވެ. އެހެން ނުވާންވީ ސަބަބެއް ނެތެވެ. އޭނާއަކީ އުފަން ރަށް މަރަދޫގައި ހިންގާ އެންމެ ބޮޑު އަދި އެންމެ މަގުބޫލް ރެސްޓޯރަންޓްގެ އޯނަރެވެ.
މަރަދޫ ލިންކް ރޯޑްގައި ހުންނަ "ޕާމް ޝޯ" ރެސްޓޯރަންޓަކީ ޓޫރިޒަމް ދާއިރާގެ ތެރެއިން ރިޔާ އަށް އުފެދުނު ޝައުގުވެރި ކަމެއްގެ ތެރެއިން އުފެދިގެން އައި ވިޔަފާރިއެކެވެ.
އެ ވިޔަފާރީގައި އޭނާ ވަރަށް ކާމިޔާބެވެ. ރަށުން ބޭރުގައި، މުޅިން އެހެން އަތޮޅެއްގައި ހިންގާ ރިސޯޓެއްގައި ރިޔާ މިހާރު ވެސް އަންނަނީ ޒިންމާދާރު މަގާމެއް އަދާ ކުރަމުންނެވެ.
އޭނާއަކީ ދާދި ފަހުން ރ. އަތޮޅުގައި ހުޅުވި ފަރުވެރި އައިލެންޑް ރިސޯޓް އެންޑް ސްޕާގެ އެފްއެންޑްބީ އެގްޒެކެޓިވް ޝެފެވެ.
ޓޫރިޒަމް ދާއިރާ އަށް ރިޔާ ނިކުތީ އޯ ލެވެލް ހެދުމަށް ފަހު ހޮޓެލް ސްކޫލް ތަމްރީނު ކުރުމަށް ފަހު 1991 ގަ އެވެ. އޭނާ ފުރަތަމަ ވަޒީފާ އަދާ ކުރީ އޭރުގެ އަރި ބީޗް އަދި މިހާރުގެ ނަމުން ނަމަ ލަކްސް ރިސޯޓްގަ އެވެ.
އެ ރިސޯޓްގައި އަހަރެއްހާ ދުވަސް މަސައްކަތް ކުރުމަށް ފަހު، ރިޔާޒް ދެން ބަދަލުވީ އޮޅުވެލި ވިއުއަށެވެ. ޓޫރިޒަމް ދާއިރާގައި މަސައްކަތް ކުރަން ބޭނުންވާ މީހުންނަށް ރާއްޖޭގައި ފުރުސަތުތައް އެބަ ހުއްޓެވެ. މަސައްކަތްކޮށްލާނެ ރިސޯޓްތައް އެބަ ހުއްޓެވެ.
މި ސަބަބާ ހުރެ ފަހުން ރިޔާ ވަނީ ޕެރަޑައިސް ރިސޯޓަށް ބަދަލުވެފަ އެވެ. އެއީ 1995 ގަ އެވެ.
"އޭރު އެތަނާ އަހަރެން ޖޮއިން ކުރި އިރު، ޕެރަޑައިސްގެ ކިޗަން ކޮންސަލްޓަންޓެއްގެ ގޮތުގައި މަސައްކަތް ކުރީ ސްކޮޓްލަންޑްގެ އަހަރެންގެ ވަރަށް ގާތް ރައްޓެއްސެއް،" އާއިލާގައި ތިބި ހަ ކުދިންގެ ތެރެއިން ދޮށްޓަށް ހުރި ރިޔާ ބުންޏެވެ. "އަސްލު އެފްއެންޑްބީ ދާއިރާ އަށް އެހާ ބޮޑަށް ހިތްޖެހުނު އެންމެ ބޮޑު ސަބަބަކީ އެއީ."
މީގެ ނަތީޖާއަކަށްވެގެން ދިޔައީ އެފްއެންޑްބީ ދާއިރާ އަށް ހުރި ޝައުގެއްގެ ބޮޑުކަމުން ލިބުނު ތަމްރީނުތަކާ އެކު ގާތްގަނކަށް 10 ވަރަށް މަސް ދުވަހުގެ ތެރޭގައި ރިޔާ އަށް ޕެރަޑައިސްގެ އެގްޒެކްޓިވް ޝެފްގެ މަގާމާ ހަމައަށް އާދެވުމެވެ.
އޭރު އޭނާގެ އުމުރަކީ އެންމެ 27 އަހަރެވެ.
"އެ ކާމިޔާބީ އަށް ބަލާ އިރު އެއީ އެ ދުވަސް ވަރު އެފަދަ މަގާމެއްގައި ހުރި އެންމެ ޒުވާން ދިވެހި އެގްޒެކެޓިވް ޝެފަށް ވާނެ،" ވަރަށް ފަހުރުވެރިކަމާ އެކު ރިޔާ ބުންޏެވެ.
ޓޫރިޒަމް ދާއިރާއިން ކުރިއަށް ދާން ބޭނުންވެގެން ރިޔާ ވަނީ ފަހުން ވެސް ރާއްޖޭން ބޭރު ކިޔަވައި ތަމްރީނުތަކެއް ފުރިހަމަކޮށްފަ އެވެ. އެގޮތުން އޭނާ ވަނީ އިނގިރޭސިވިލާތުގެ ހޮޓެލް ސްކޫލްގައި ބެޗްލާސް ޑިގްރީ ފުރިހަމަކޮށްފަ އެވެ.
އަދި ފަހުން މާސްޓާޒް ޕްރޮގްރާމަކަށް ވެސް ދާން ނިންމި އެވެ. އެކަމަކު މަސައްކަތް ހުރި ގޮތުން އެ މަރުހަލާ އޮތީ ފުރިހަމަ ކުރެވޭ ގޮތް ނުވެ އެވެ.
ޕެރެޑައިސްގައި 10 އަހަރު ވަޒީފާ އަދާ ކުރުމަށް ފަހު، ދެން ވެސް ރިޔާޒް ބޭނުންވީ އެހެން ދިމާލެއްގައި ތަޖުރިބާ ހޯދާށެވެ. އެގޮތުން ދެން މިސްރާބު ޖެހީ ބަނޑޮހަށެވެ.
އެތަނުގައި އޭނާ އަދާ ކުރާ އެފްއެންޑްބީ މެނޭޖަރެއްގެ މަގާމެވެ.
"މިކަހަލަ ކޮންމެ މަގާމަކީ ވަރަށް ޗެލެންޖިން މަސައްކަތެއް. ލިބޭ ކޮންމެ ތަޖުރިބާއަަކީ ކުރިއަށް ދާން ލިބޭ ހިތްވަރެއް. މި ދާއިރާ އަށް އިތުރަށް ލޯ ހުޅުވިގެންދާ ކަމެއް." ރިޔާ ބުންޏެވެ.