ބައެއް މީހުންނަށް ހީވެފައި އޮންނަ ގޮތުން ބޮލީވުޑްގައި ކާމިޔާބު އަދި މަޝްހޫރު މީސްމީހުންނަކީ އެއްވެސް ފިކުރެއް ނުތަނަވަސް ކަމެއް ނެތް ވަރަށް އުފާވެރި ދިރިއުޅުމެއް އުޅޭ ބަޔެކެވެ.
އެކަމަކު މާޒީންނާއި މިހާރަށް ބަލާ އިރު ވެސް އެއީ މުޅިއަކުން ހަގީގަތެއް ނޫނެވެ.
ބޮލީވުޑްގައި މިހާރު ހުރި އެންމެ މަޝްހޫރު އަދި އެންމެ އަގު ބޮޑު ބަތަލާ ދީޕިކާ ޕަދްކޯން ޑިޕްރެޝަނަށް ފަރުވާ ހޯދި ވާހަކަ ބުނުމުން ވަރަށް ގިނަ ބަޔަކު ހައިރާންވި އެވެ. ގިނަ ބަޔަކު އެންމެ ހައިރާންވީ އެހާ ކާމިޔާބު އަދި އެހާ އަގު ޑިމާންޑް ބޮޑު ބަތަލާއަކު ޑިޕްރެޝަނަށް ދާން ޖެހުނީ ކޮން ކަހަލަ ސަބަބުތަކާ ހެދިތޯ އެެވެ.
އެކަމަކު މި ހިސާބުން އެ ވާހަކަ ކުރުކޮށްލާފައި މަޝްހޫރު ޑައިރެކްޓަރު/ޕްރޮޑިއުސަރު ކަރަން ޖޯހަރުގެ ވާހަކައަށް ދަމާ ހިނގާށެވެ.
"ކުޗް ކުޗް ހޯތާ ހޭ" އާއި "ކަބީ ހުޝީ ކަބީ ޢަމް" ފަދަ ފިލްމްތައް ޑައިރެކްޓްކޮށްފައިވާ ކަރަން އެންޑީޓީވީ އަށް ރޭ ދިން އިންޓަވިއުއެއްގައި ބުނީ އޭނާ ދެ އަހަރު ވަންދެން ޑިޕްރެޝަނަށް ފަރުވާ ހޯދީ ކަމަށެވެ.
އަދި އެކަމުން އަރައި ގަނެވިި، ބޭސް ކެއުން ހުއްޓާލީ މީގެ ތިން މަހެއްހާ ދުވަސް ކުރިން ކަމަށް އޭނާ ބުންޏެވެ.
ކަރަންއަކީ ބޮލީވުޑަށް ބަލައިފި ނަމަ "ސޯޝަލް ބަޓަފްލައި" އެކެވެ. އޭނާގެ ވަށައިގެން މަޝްހޫރު އެތައް ބަޔަކު ގާތް ރައްޓެހިންގެ ގޮތުގައި އެބަ ތިއްބެވެ. މަޝްހޫރު ހުރިހާ މީހުންނަކީ ކަރަންގެ ވަރަށް ގާތް މީހުންނެވެ. ދުވަސްވީ އެކްޓަރުންނާއި ޒުވާން އާ އެ އެކްޓަރުންނަށް ބެލިޔަސް ކަރަންގެ ވަށައިގެން އެ ހުރިހާ އެންމެން އެބަ ތިއްބެވެ.
އަނެއްކޮޅުން އޭނާގެ ފިލްމް ކުންފުނި ދަރްމާއަކީ އިންޑިއާގެ އެންމެ ކާމިޔާބު އެއް ޕްރޮޑަކްޝަން ހައުސްއެވެ. ފައިސާގެ މައްސަލައަކީ ކަރަން އަށް އެއް އިރެއްގައި ވެސް ދަތި އެއްޗެއް ނޫނެވެ.
ކައިވެންޏެއް ނުކުރި ނަމަ އޭނާ ދިރިއުޅެނީ ވަަރަށް ފާގަތި މުއްސަނދި ދިރިއުޅުމެކެވެ. ބޭނުން އިރަކު، ބޭނުން ގައުމަަކށް ދަތުރުކޮށްލެވެ އެވެ.
އެކަމަކު އެވަރުގެ މީހަކު ޑިޕްރެޝަންގެ ވާހަކަ ދެއްކުމުން އެންމެން ވެސް ހައިރާން ވާނެ އެވެ. ހަގީގަކީ ހީކުރާހާ ވަރަށް މިފަދަ ސެލެބްރިޓީންގެ ދިރިއުޅުން އުފާވެރި ނޫން ކަަމެވެ.
މާޔޫސްކަމާއި ހިތްދަތިކަން އެ މީހުން ވެސް ވަށާލަ އެވެ. ނަތީޖާއަކީ ޑިޕްރެޝަން ކަހަލަ ސިއްހީ މައްސަލަތަކަށް ހުށަހެޅުމެވެ.
ކަރަން ބުނި ގޮތުގައި އޭނާ ޑިޕްރެޝަން ތަޖުރިބާ ކުރަމުން ދިޔަ ދުވަސްވަރު އެ ވާހަކަ އެއްވެސް މީހެއްގެ ގާތަކު ނުދައްކަ އެވެ. އަދި އެ ވާހަކަ ކޮންމެހެން ވަކި މީހެއްގެ ގޮތުގައި ދައްކަން ޖެހޭ ސަބަބެއް ވެސް ނެތް ކަމަށް އޭނާ ބުންޏެވެ.
ކޮންމެއަކަށް ކަރަން މިހާރު ހުރީ ހިތްހަމަޖެހިގެންނެވެ. ޑިޕްރެޝަނުން އޭނާ އަރައިގެންފި އެވެ.
އަންނަ މަހުގެ 28 ވަނަ ދުވަހަކީ އަނެއްކާ ވެސް ކަރަންގެ ޑައިރެކްޝަނެއް ބެލުންތެރިންނާ ހަމައަށް އަންނާނެ ދުވަހެކެވެ.
ވަރުގަދަ ކާސްޓެއް ހިމެނޭ "އޭ ދިލް ހޭ މުޝްކިލް" އަކީ މި އަހަރުގެ ކާމިޔާބު ފިލްމަށް ވާނެ ކަމަށް މިހާރު ވެސް ވަނީ ބެލެވެން ފަށައިފަ އެވެ.