ހަކުރު ބައްޔަކީ ދިވެހިންގެ ތެރޭގައި މިހާރު ވަރަށް އާންމު ބައްޔެކެވެ. އެހެންވެ މި ބައްޔާ މެދު އުމުރުން ދުވަސްވީ މީހުންނާއި ޒުވާނުން ވެސް މިހާރު ވަަރަށް ބޮޑު ސަމާލު ކަމެއް ދެ އެވެ.
ހަކުރު ބަލިން ރައްކާތެރިވުމަށްޓަކައި ކެއުމުގެ ވައްޓަފާޅި އަށް ވެސް މިހާރު ގިނަ ބަޔަކު ބަދަލުތަކެއް ގެނެސްފައިވެ އެވެ. ހަކުރު ބައްޔަކީ ހަށިގަނޑު ހިއްކާލައި މީހާގެ ބުރަ ސޫރަ އަށް ވެސް ބޮޑެތި ބަދަލުތަކެއް ގެނުވާ ބައްޔެކެވެ.
މި ބައްޔަށް ތަފާތު ފަރުވާތައް ވެސް އެބަ ހުއްޓެވެ. އެކަމަކު މި ފަހަރު ދައްކާނީ މުޅިން ތަފާތު ފަރުވާއެއްގެ ވާހަކަ އެވެ. އެއީ ގިނަ ބަޔަކަށް އެހާ ބޮޑަށް އެނގިފައި ނެތް ފަރުވާއަކަށް ވެސް ވެދާނެ އެެވެ.
އެކަމަކު މިއީ ދިވެހިންނަށް އޮތް އުފާވެރި ހަބަރަކަށް ވެދާނެ އެވެ. އެއީ އަނބު ފަތުން ހަކުރު ބައްޔަށް ފަރުވާ ކުރެވޭ ވާހަކަ އެވެ.
އަނބު ގަހަކީ ރާއްޖޭގައި އެންމެ އާންމު އެެއް ގަހެވެ. އެހެންވެ ހަކުރު ބަލީގެ ފަރުވާ އަށް އަނބު ފަތް ހޯދުމަކީ އެއްގޮތަކަށް ވެސް އުނދަގޫ ކަމަކަށް ނުވާނެ އެވެ.
ސިއްހީ ތަޖުރިބާކާރުން ވިދާޅުވާ ގޮތުގައި އަނބު ފަތުގެ ތާސީރުން ހަކުރު ބައްޔަށް ޖާދުލެއް ފަދަ ފަރުވާއެއް ލިއްބައި ދެ އެވެ. އަނބު ފަތަކީ ސިއްހީ ގޮތުން ވަރަށް ފައިދާ ހުރި މާއްދާތަކެއް އެކުލެވޭ ފަތެކެވެ.
އޭގެ ތެރޭގައި ކެފެއިކް އެސިޑް، މެންގަފެރިން، ފްލެވޮނޮއިޑްސް އަދި ގެލިކް އެސިޑް ހިމެނެ އެވެ.
މި މާއްދާތައް އަނބު ފަތުގައި އެކުލެވޭތީ އޭގެ ތާސީރުން ހަށިގަނޑުގެ ކޮލެސްޓްރޯލް ކޮންޓްރޯލްކޮށްދީ، ހަށިގަނޑުގައި އެކުލެވޭ ޓޮކްސިންތައް ބޭރުކޮށްދީ އެލާޖިކް ވުން ފަދަ މައްސަލަތަކުން ވެސް ދުރުކޮށްދެ އެވެ.
އަނބު ފަތުގެ ތާސީރު ބޭނުން ކުރުމުން ހަށިގަނޑުގައި އެކުލެވޭ ބްލަޑް ޝުގާގެ މިންވަރު ކޮންޓްރޯލްކޮށްދެ އެވެ. އޭގައި އެކުލެވޭ ގުލްކޯޒްގެ ސަބަބުން ހަކުރު ކޮންޓްރޯލްކޮށްދެ އެވެ.
އަނބު ފަތުގައި ގިނަ އަދަދަކަށް ވިޓަމިން ސީ އާއި ފައިބާ އަދި ޕެކްޓިން އެކުލެވުމުގެ ނަތީޖާއަކީ ހަށިގަނޑުގައި އުފެދޭ ނުރަނގަޅު ކޮލެސްޓްރޯލް ކޮންޓްރޯލްކޮށް ދިނުމެވެ.
މީގެ އިތުރުން އޭގައި އެކުލެވޭ ވިޓަމިން އޭގެ ސަބަބުން ލޮލުގެ ފެނުމަށް ދިމާވާ މައްސަލަތައް ވެސް އަނބު ފަތު ތާސީރުން ހައްލުކޮށްދެ އެވެ.
އެހެންވެ މި ސަބަބުތަކާ ހުރެ ތަޖުރިބާކާރުން މި ބުނަނީ ހަކުރު ބަލީގެ ޝިކާރައަކަށްވެ، ކުއްލިއަކަށް ބަރުދަން ލުއިވެ، މީހާ އަނަރޫފަވުމަށް ކުރިމަތިވާ މައްސަލަތަކާއި ހާއްސަކޮށް ރޭގަނޑު ލޮލުގެ ފެނުމަށް ދިމާވާ މައްސަލަތަކުން ދުރުކޮށް ދޭ ކަމަށެވެ. އެހެންވެ ދެން އޮތް ސުވާލަކީ އަނބު ފަތް ބޭނުން ކުރާނީ ކިހިނެއްްތޯ އެވެ؟
އަނބު ފަތް ބޭނުން ކުރާނެ ގޮތް:
ކޮންމެ ދުވަހަކު ވެސް ތާޒާ 10-15 އަނބު ފަތް ހޯދާށެވެ. ރަނގަޅަށް ދޮވެލާފައި ބަހައްޓާށެވެ.
ރޭގަނޑު ނިދުމުގެ ކުރިން ހެޔޮވަރު ތެއްޔެއްގައި ފެން ހޫނުކޮށްލާށެވެ. ދެން އޭގެ ތެރެއަށް އަނބު ފަތް އަޅާފައި ހެނދުނު ވަންދެން ބަހައްޓާށެވެެ.
ހެނދުނު ހޭލާފައި ހުސް ބަނޑާ ހުރެ އަނބު ފަތު ތާސީރު ބޯނީ އެވެ. އެހެން ގޮތަކަށް ބުނާ ނަމަ އަނބު ފަތު ދިޔައަކީ ހެނދުުނުގެ ސަޔަށް ހަދާށެވެ.
މިކަން އާދަކޮށް ދެތިން މަސް ވަންދެން ކުރިއަށް ގެންދާ ނަމަ، ހަކުރު ބަލީގެ ސަބަބުން ދިމާވާ މައްސަލަތަލަށް އެދެވޭ ހެޔޮ ބަދަލުތަލެއް އަންނަކަން އަމިއްލަ އަށް ތަޖުރިބާ ކުރެވެން ފަށާނެ އެވެ.